Kúdiktiniń sýıtsıdi: Jambyl oblystyq Polıtsııa departamenti túsinik berdi
TARAZ. QazAqparat –Jambyl oblystyq Polıtsııa departamenti Baızaq aýdanynyń turǵyny Dmıtrıı Mıngalımovtyń óz-ózine qol jumsaý oqıǵasyna qatysty málimdeme taratty. Onda sýıtsıdke polıtseılerdi kinálaǵan aqparattar shyndyqqa sáıkes kelmeıtini aıtylǵan, dep habarlaıdy QazAqparat tilshisi.
Aıta keteıik, jýyrda BAQ-ta atalmysh oqıǵaǵa qatysty aqparat jaryq kórip, onda marqumnyń jubaıy Aleksandra Mıngalımova joldasynyń ólimine polıtsııa qyzmetkerlerin kinálaǵan. «Jazyqsyz jala jaýyp, óz-ózine qol jumsaýǵa deıin jetkizdi», - degen A.Mıngalımovanyń janaıqaıy áleýmettik jelide talqyǵa túsken bolatyn. Alaıda, oblystyq Polıtsııa departamenti azamatshanyń quqyqqorǵaý organdaryna artqan aıyby negizsiz ekendigin atap ótti.
Baızaq aýdanynyń turǵyny Dmıtrıı Mıngalımov aǵymdaǵy jyldyń 31 naýryzynda seksýaldyq sıpattaǵy zorlyq-zombylyq jasaǵany úshin ustalǵan bolatyn. Sotqa deıingi tergeý barysynda onyń qylmysy jábirlenýshiniń jáne 4 kýágerdiń aıǵaǵymen, sondaı-aq jábirlenýshiniń denesindegi dene jaraqatymen rastalǵan. Sonymen qatar, qylmys ornynda kúdiktiniń uıaly telefony tabylǵan. Kúdiktini tergeý áreketteriniń barlyǵy zań sheńberinde onyń qorǵaýshysynyń qatysýymen júrgizilgen. Onyń turaqty turatyn jeriniń, otbasynyń jáne kámeletke tolmaǵan eki balasynyń bolýyn eskere otyryp, ol «kelý týraly mindettememen» ýaqytsha bosatylǵan. Alaıda, kelesi kúni Talas ózeniniń mańynan, Sarykemer aýylyna jaqyn jerden D.Mıngalımovtyń máıiti tabylǵan. Kúdiktiniń óz-ózine qol jumsaǵany anyqtaldy. Oqıǵa bolǵan jerdi qaraý kezinde hat tabylyp, onda marqum óz ólimine polıtsııa qyzmetkerlerin aıyptaǵan.
«Atalǵan oqıǵaǵa qatysty polıtsııa qyzmetkerleri tarapynan quqyqbuzýshylyqtar anyqtalǵan joq, tolyq jáne obektıvti tergeý júrgizildi. Jambyl oblysy PD Ózindik qaýipsizdik basqarmasy ózine-ózi qol jumsaýǵa jetkizý faktisi boıynsha sotqa deıingi tergeý júrgizip, birqatar sot saraptamalary taǵaıyndaldy. Marqumnyń denesinen jubaıy aıtqandaı elektroshokerlerdiń izderi, sondaı-aq tergeýdiń ruqsat etilmegen ádisterin qoldanýdan paıda bolǵan dene jaraqattary anyqtalmady. Sonymen qatar, marqumnyń qanynda alkogol tabyldy. Aǵymdaǵy jyldyń 30 maýsymynda tergeý qorytyndysy boıynsha polıtsııa qyzmetkerlerine qatysty qylmystyq is qylmys quramynyń bolmaýyna baılanysty toqtatyldy», - dedi oblystyq Polıtsııa departamenti baspasóz qyzmetiniń jetekshisi Gúlsara Muhtarqulova.
Sonymen qatar, quzyrly organnyń habarlamasynda aǵymdaǵy jyldyń 2 tamyzyndaǵy mamandandyrylǵan tergeý sotynyń qaýlysymen máıitti qosymsha saraptamalyq zertteý úshin eksgýmatsııalaýdy júrgizý qajettiligi týraly, sondaı-aq qylmystyq isti toqtatýdy zańsyz dep taný týraly jeke shaǵym qanaǵattandyrýsyz qaldyrylǵandyǵy aıtylǵan.
