Kúdiktilerdi qamaýda ustaý merzimin qysqartý usynyldy

ASTANA. QazAqparat - Qazaqstannyń quqyq qorǵaý qyzmetin jetildirý men qylmystyq protsesin reformalaý boıynsha arnaıy qurylǵan vedomstvoaralyq jumys toby tutqynǵa alý sharasy qoldanylatyn qylmystar tizimin qysqartýdy usyndy, dep habarlaıdy QazAqparat tilshisi.

«Qamaýǵa alý men bostandyqty shekteý eń qatań bultartpaý sharasy retinde aıryqsha jaǵdaılarda, ózge sharalardy qoldaný múmkin bolmaǵanda ǵana qoldanylýy tıis. Eger adam qoǵamǵa qaýipti bolmasa, ony tutqyndaýdyń qajeti shamaly. Úıqamaq sekildi ózge sharalardy qoldanǵan jón», - dedi QR Bas prokýrorynyń orynbasary Marat Ahmetjanov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, qylmystyq top jasaǵan quqyqbuzýshylyqtardy eseptemegende, bul qysqartýlar eń aldymen, ekonomıkalyq qylmystarǵa qatysty bolmaq.

«Ekonomıkalyq qylmysta kúdikti atanǵandardy tutqyndaý qajet emes dep oılaımyz. Degenmen, bul qylmystar uıymdasqan qylmystyq toppen jasalsa, másele qıyndaı túsedi. Onda árbir jaǵdaıǵa jekeleı qaraýǵa týra keledi. Barlyq tutqyndaýlar men barlyq sharalardyń aldyn ala tergeý sátinde qajetti aıǵaqtardy alýy úshin jasalatyny anyq. Sondyqtan, dál qazirgi ýaqytta qamaýda ustaý merzimin qysqartý máselesi týyndap otyr», - dedi ol.

Osylaısha, kúdiktini qamaýda ustaý merzimin 72 saǵattan 48 saǵatqa deıin qysqartý jáne erekshe jaǵdaılarda 72 saǵatqa deıin ustaý usynyldy.