Kúdiktige kúsh qoldanǵan hromtaýlyq polıtseıler sottaldy
ASTANA. QazAqparat - Hromtaý aýdandyq soty polıtsııa qyzmetkerlerine qatysty is boıynsha úkim shyǵardy, dep habarlaıdy Aqtóbe oblystyq soty.
Hromtaý aýdandyq sotynyń 2016 jylǵy 17 qazandaǵy úkimimen Hromtaý aýdandyq ІІB qyzmetkerleri S.Qadyrjanov, B.Bahradınov jáne B.Qurmanbaı QR QK-niń 146 babynyń 2 bóligi 1 tarmaǵy boıynsha memlekettik qyzmette jáne quqyq qorǵaý organdarynda laýazymdy ıelený quqyǵy shektele otyryp 3 jylǵa bas bostandyǵynan aıyryldy. Osy úkim boıynsha aıyptalýshylar arnaıy áskerı shenderinen aıyryldy.
Іstiń materıaldaryna júginsek, atalmysh Hromtaý aýdandyq ІІB ǵımaratynda polıtsııa qyzmetkerleri toptasyp jábirlenýshi M.Quspanovqa alaıaqtyqqa qatysty málimetter alý jáne ony moıyndatý úshin psıhıkalyq jáne fızıkalyq qysym kórsetken. Osy maqsatta olar kúdiktelgen azamatqa sot saraptama aıǵaqtaǵan dene jaraqatyn salǵan.
Memlekettik aıyptaýshy burynǵy polıtsııa qyzmetkerlerine QR QK-niń 146 babynyń 2 bóligi boıynsha 5 jyl bas bostandyǵynan aıyrýdy surady. Sot buryn olardyń sottylyǵy bolmaǵanyn, jumys oryndary men turǵan jerleriniń bergen jaqsy minezdemeleri men S.Qadyrjanov pen B.Qurmanbaıdyń kámeletke tolmaǵan balalary bar ekendigin eskere otyryp atalǵan baptaǵy eń tómengi shekti bas bostandyǵynan aıyrý merzimin taǵaıyndady.
Sot sheshimi zańdy kúshine engen joq.
