Kúdikti lombardqa pnevmatıkalyq qarýmen barǵan - Astana ІІD (FOTO)

ASTANA. QazAqparat - Astanada lombardty tonamaq bolǵan kúdiktiniń qolynda pnevmatıkalyq qarý boldy. Bul týraly búgin oqıǵa ornynda QazAqparat tilshisine Astana ІІD baspasóz qyzmetiniń jetekshisi Sofıa Qylyshbekova málim etti.

«Kúdiktiden pnevmatıkalyq tapansha tárkilendi. Qazirgi kezde ol ballıstıkalyq saraptamaǵa jiberildi. Tergeý amaldary jalǵasýda, sondaı-aq Qylmystyq kodekstiń 192-shi babynyń qaraqshylyq faktisi boıynsha sotqa deıingi tergeý júrgiziledi», - dedi baspasóz qyzmetiniń jetekshisi.

Onyń sózine qaraǵanda, atalǵan lombardta kúzetshi bolmaǵan, ıaǵnı ǵımarattyń dabyl belgisi qashyqtyqtan kúzet fırmasyna qosylǵan eken.

Budan buryn kúdikti 1979 jylǵy ekendigi habarlanǵan edi. Sońǵy málimetter boıynsha, ol 1974 jylǵy  elorda turǵyny ekeni anyqtaldy. Atalǵan lombardtyń eki qyzmetkeri aman-esen bosatyldy. Atap aıtqanda, kelissózder júrgizilip, kúdikti polıtsııaǵa qarsylyq kórsetken joq. Jalpy eshkim de zardap shekpedi.

Eske sala keteıik, búgin Kenesary kóshesinde «Spýtnık»  dúkeni aýdanynda ornalasqan M-Lombardty tonaýǵa áreket jasaldy. Іshke basyp kirý kezinde dabyl tetigi iske qosylyp, esik avtomatty túrde qulyptalyp, ishte kúdikti jáne eki lombard qyzmetkeri qamalyp qaldy.

Sondaı-aq baspasóz qyzmeti bul  lańkestikpen baılanysty emes, qatardaǵy tonaý oqıǵasy ekenin atap ótti.