Kúdikti bıznes ashýǵa kómektesemin dep 12 áıeldi aldaǵan
TÚRKІSTAN. QazAqparat – Túrkistan oblysy, Saryaǵash aýdanynda alaıaq «ınternet-bıznes jasaýǵa tirkep beremin» dep 12 adamdy aldaǵan. Kúdikti áıeldiń jábirlenýshilerge keltirilgen shyǵyn kólemi 2,5 mln teńgeni quraǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Saryaǵash APB-ne birneshe turǵyn aryzdanǵan. Onda jábirlenýshi áıelder árqaısysy bıznestiń deńgeıine baılanysty kúdiktige 35 - 350 myń teńgeniń aralyǵynda bergenin jetkizgen. Alaıda ol sózinde turmaı, aqshalaryn qaıtarmaı qoıǵan bolyp shyqty.
«Atalǵan jaıt QR QK-niń 190-baby «Alaıaqtyq» boıynsha tirkeldi. Jábirlenýshilerdiń aıtýymen kúdiktiniń jeke-basy anyqtalyp, alaıaq áıel ustaldy. Ol óz kinásin tolyq moıyndady», - delingen habarlamada.
Saryaǵash aýdanynda taǵy bir kúdikti turǵyndardy «Aqtaý qalasyndaǵy fırmanyń birine jumysqa ornalastyryp beremin» dep aldaǵany anyqtalǵan. Tergeý barysynda kúdiktiniń eki jábirlenýshiden 220 myń teńgeden alyp, aldap ketkeni belgili bolyp otyr. Qazirgi tańda atalǵan jaıt boıynsha QR QK-niń 190-baby «Alaıaqtyq» boıynsha sotqa deıingi tergeý amaldary júrgizilýde.
