Kúdebaevtyń shekaradan qalaı ótip ketkeni belgili boldy

ASTANA. QazAqparat – Bas prokýrordyń orynbasary Jandos Ómirálıev Serik Kúdebaevtiń Qyrǵyz eline qalaı ótip ketkenin aıtty, dep habarlaıdy QazAqparat tilshisi.

«Ol shekaramyzdan tys jerden Qyrǵyz memleketine ótip ketken. Shekaraǵa jetkizgen kólik júrgizýshisine onyń mundaı áreketke baratyny belgili bolmaǵan. Sol sebepti ózi ǵana jaýapqa tartylyp jatyr. Ol (Kúdebaev) shekaranyń ótkizý pýnktinen ótpegen. Kegen aýdanynda shekara temir torynyń astyn kóterý arqyly ótip ketken», - dedi ol Májilistiń jalpy otyrysynan keıin BAQ ókilderiniń saýalyna oraı.

Onyń atap ótýinshe, osy jaıtqa baılanysty Serik Kúdebaevtyń ústinen memlekettik shekarany zańsyz kesip ótkeni úshin qosymsha qylmystyq is qozǵalǵan.

Eske salaıyq, Almaty oblystyq polıtsııa departamentiniń eks-basshysy Serik Kúdebaev qańtar oqıǵasy boıynsha 10 jylǵa sottalǵan bolatyn. Biraq ol sot úkimimen kelispeı, apellıatsııaǵa berdi.