Qudaıy as berý, jerleý rásimderin bir júıege keltiretin «Janaza» kitaby shyǵady(FOTO)
ALMATY. QazAqparat - Qudaıy as berý mádenıetin qalyptastyrýymyz qajet. Almaty qalasynda ótip jatqan Qazaqstan musylmandary dinı basqarmasynyń Ǵulamalar keńesinde «Janaza» kitabyn talqylaý barysynda Bas múftı Erjan qajy Malǵajyuly osylaı dedi. Bul týraly QMDB baspasóz qyzmeti habarlady.
QMDB tóraǵasynyń aıtýynsha, keıbir adamdar durys túsinbeý saldarynan ári turmystyq jaǵdaıyn eskermesten kisi qazasynan keıin asta-tók qudaıy as beredi.
Otyrysta teolog ǵalymdar da qaryzǵa batyp, toı jasaǵandaı baryn tógip, dastarqandy tátti taǵamdarǵa, shyryn sýsyndaryna toltyryp jiberetinder týraly oılaryn ortaǵa saldy.
«Toıdyń jóni bólek. Al qudaıy as berýdiń ózindik ádebi, tártibi bar emes pe? Shekten tys shyǵynǵa batyp, ysyrap etýge bolmaıdy. Muny dinimiz de quptamaıdy. Biz elimiz boıynsha barshaǵa tıimdi bolatyn qudaıy astyń ortaq mázirin ázirlep, kópshilik qaýymǵa usyndyq. Bul bastamamyzǵa el aǵalary, aqsaqaldar, zııaly qaýym ókilderi, meshit jamaǵaty úlken qoldaý kórsetip jatyr. Máselen, Pavlodar oblysyndaǵy ortalyq meshittiń ashanasynda osy as máziri boıynsha qudaıy as berilip keledi. Jergilikti jamaǵat ıgi bastama úshin alǵysyn bildirip, izgi tilekterin jetkizýde. Qolǵa alǵan jumysymyz ózge de oblystarda júzege asady degen oıdamyz», - dedi Erjan qajy Malǵajyuly.
Qazaqstan musylmandary dinı basqarmasynyń Pavlodar oblysy boıynsha ókil ımamy Narıman Isenovtyń aıtýynsha, meshitke jergilikti halyq arasynan: «Nesıe alyp, Qudaıy as bersem bola ma?» - dep surap keletinder de bar eken. «Bul - dinimizde quptalmaıtyn amal. Al biz usynǵan jańa as máziri asqa ketetin shyǵyndy eki esege azaıtady», - deıdi N.Isenov.
Keńeste talqylanyp jatqan «Janaza»" kitabynda: «Qaıtys bolǵan kisiniń atynan as berý - musylman sharıǵatynda mindetti túrde atqarylýy tıis paryz amaldaryna jatpaıdy. Dinimizde mindetti túrde qaryzdanyp nemese ózińe qajetti qarjyńdy jumsap, qaıtys bolǵan kisi atynan úlken mal soıyp, sadaqa ber degen úkim joq. Sadaqalar, Qudaıy astar berilgen jaǵdaıda ysyrapqa jol berilmesten atqarylýy tıis», - delingen.
Aıta keteıik, elimizde qudaıy as, sadaqa berý, mazar salý, jerleý, t.b. rásimderdi bir izge, biryńǵaı júıege keltirý maqsatynda ázirlenip jatqan «Janaza» kitaby Ǵulamalar keńesiniń atsalysýymen jýyrda jaryqqa shyqpaq.
