Qudaıbergen Sarjanov - Aral problemasyn sheshýge atsalysqan qaıratker
QYZYLORDA. QazAqparat - Qazaq SSR balyq sharýashylyǵynyń burynǵy mınıstri, Eńbek ardageri Qudaıbergen Sarjanov 80 jasqa toldy. Ol Aral teńizin qutqarýǵa jáne qaıaz balyǵyn saqtap qalýǵa úles qosqan jandardyń biri.
Oblys ákimi Qyrymbek Kósherbaev Qudaıbergen Sarjanulyn osy mereıtoıymen quttyqtady, dep habarlady QazAqparat tilshisi.
«Syr óńirinde abyroımen eńbek etken, el múddesi jolynda aıanbaı ter tókken kóptegen tanymal tulǵalar bar. Osyndaı azamattardyń biri - elimizdiń balyq sharýashylyǵy salasynyń damýyna aıtýly úles qosqan Qazaq SSR Balyq sharýashylyǵynyń burynǵy mınıstri, memleket jáne qoǵam qaıratkeri Sarjanov Qudaıbergen aǵamyz. Siz elimizdiń damýy, ósip-órkendeýi jolynda eńbek etip, «aǵaǵa qurmet - kishiden izet» degen paıymdy berik ustanyp, ónegeli ǵumyr keshtińiz. Búgingi kúni Qazaqstan Respýblıkasynyń Qyzyl kitabyna engen Aral qaıaz balyǵynyń shabaǵyn ósirip, baǵaly balyq tuqymynyń Aral teńizinde qaıta qalpyna keltirýge áli de ólsheýsiz úles qosyp kelesiz. Balyqshylar turatyn eldi mekenderde mektep, aýrýhana, turǵyn úıler salynýyna atsalysyp, Aral, Balqash problemalary jónindegi halyqaralyq qoǵamdyq komıtetiniń múshesi bola júrip, Aral problemasyn sheshý úshin zań shyǵarýǵa úlken úles qostyńyz. Osyndaı eńbegińiz úshin Qudaıbergen Sarjanulyna Qyzylorda oblysynyń Qurmetti azamaty ataǵy beriledi», - dedi oblys ákimi Qyrymbek Kósherbaev.
Kóp jyldardan bergi balyq sharýashylyǵy salasyndaǵy jáne óńirdiń áleýmettik-ekonomıkalyq damýyna qosqan úlesi úshin Sarjanov Qyzylorda oblysynyń jáne «Nur Otan» partııasynyń Qurmet gramotalarymen marapattalyp, keýdesine «Aýyl sharýashylyǵy salasynyń úzdigi» tósbelgisi taǵyldy.
Mereıtoı ıesin QR Aýyl sharýashylyǵy mınıstrliginiń basqarma basshysy Narıman Júnisov jáne ózge de áriptesteri quttyqtady. Óz kezeginde Qudaıbergen Sarjanuly qurmet jasaǵandaryna alǵys aıtyp, olardy Aral aýdanynda ashylǵan murajaıdy tamashalaýǵa shaqyrdy.
