Qýdalaý zorlyqqa ulasqan: Shymkentte polıtsııa stalkıngtiń eki deregin áshkereledi

ASTANA. KAZINFORM — Polıtsııa qyzmetkerleri áıelderge qatysty jasalǵan stalkıngtiń eki deregin anyqtap, jolyn kesti. Eki jaǵdaıda da kúdiktiler jábirlenýshilermen buryn-sońdy tanys bolǵan, dep habarlaıdy ІІM baspasóz qyzmeti.

Vedomstvo málimetinshe, alǵashqy oqıǵada qala turǵyny polıtsııaǵa buryn qarym-qatynasta bolǵan er adamǵa qatysty aryzdanǵan. 

— Qarym-qatynastyń toqtaǵanyna qaramastan, kúdikti áıeldi mazalaýyn jalǵastyrǵan: túrli nómirlerden qońyraý shalyp, habarlamalar jazǵan, úıine jáne jumys ornyna baryp, tynyshtyǵyn buzǵan. Jábirlenýshi onymen baılanysyn tolyq úzip, áleýmettik jelilerde buǵattap, kezdesýden qashqanymen, qýdalaý toqtamaǵan. Kúdikti jedel ustalyp, qamaýǵa alyndy. Ekinshi jaǵdaıda stalkıng fızıkalyq kúsh qoldanýǵa ulasyp, jábirlenýshi polıtsııaǵa júgingen. Atalǵan jaıt boıynsha stalkıng jáne uryp-soǵý baptarymen qylmystyq is qozǵalyp, kúdikti qamaýǵa alyndy, — delingen habarlamada.

Qylmystyq ister táýlik ishinde sotqa joldandy.

Polıtsııa mundaı quqyq buzýshylyqqa jol bergen azamattar qoldanystaǵy zańnama aıasynda qatań túrde jaýapkershilikke tartylatynyn eskertedi.

Osyǵan deıin Astanada áıeldi alty aı boıy mazalaǵan er adam stalkıng úshin sottalǵany jazǵan bolatynbyz.