Qubyr jóndeıtin jumysshy túrmege telefon men nasybaı alyp kirmek boldy
NUR-SULTAN. QazAqparat – Atyraý oblysynda gaz qubyryn jóndeýshi rejımdik aýmaqqa uıaly telefon alyp kirmek bolǵan. Bul týraly QazAqparat QR ІІM Qylmystyq atqarý júıesi komıtetine silteme jasap habarlaıdy.
«Gaz qubyryn jóndeýshi jaldamaly jumysshyny tintý kezinde ish kıimi men sómkesinen 3 uıaly telefon jáne SIM-karta, nasybaı salynǵan eki qaltasha tárkilendi. Tárkilengen materıal ákimshilik sotqa joldandy», - delingen komıtettiń málimetinde.
Al Jambyl oblysynda túzetý mekemesiniń qorshaýynan 90 gramm esirtki asyrý áreketiniń joly kesilgen.
«Túngi saǵat 22.00 shamasynda Taraz qalasynyń turǵyny ustaldy. Ol túzetý mekemesiniń qorshaýynan 90 gramm marıhýana asyryp laqtyrǵan kezde qolǵa tústi. Memekeniń jeke quramy qyraǵylyq tanytqannyń arqasynda zańsyzdyqtyń joly kesildi. Jyl basynan beri qylmystyq atqarý júıesiniń qyzmetkerleri túrmelerge ruqsat etilmegen zat kirgizýdiń 310 áreketin anyqtaǵan. Kóbinese uıaly telefon, esirtki, aqsha jáne ishimdik tárkilendi», - deıdi QR Qylmystyq atqarý júıesi komıteti tóraǵasynyń orynbasary Teńizjan Jánibekov.
