Qubyr ishine qulap ketken 2 jasar kentaýlyq búldirshinniń jaǵdaıy aýyr
TÚRKІSTAN. QazAqparat- Kentaý qalasyna qarasty Hantaǵy aýylynda qubyr ishine qulap ketken balanyń jaǵdaıy aýyr. Qazir 2 jasar sábı qalalyq aýrýhananyń jansaqtaý bóliminde jatyr, dep habarlaıdy QazAqparat tilshisi.
Kentaý qalalyq ortalyq aýrýhanasy bas dárigeriniń mindetin atqarýshy Asylbek Ýtepbaev dárigerlerdiń kúndiz-túni qajetti em-dom jasap jatqanyn jetkizdi.
Aıta keteıik, oqıǵa keshe keshki saǵat 19.52 shamasynda bolǵan. Oınap júrgen búldirshin esik aldyndaǵy aǵyn sýy bar qubyrǵa qulap ketken.
Shaqyrtýǵa shuǵyl jetken Kentaý qalalyq 12 órt sóndirý bóliminiń qyzmetkerleri sábıdi sý toly qubyrdan aman-esen alyp shyqqan bolatyn.
Beınedegi kadrlardan bólimshe komandıri, azamattyq korǵaý aǵa serjanty Nurǵalı Kerimbekovtiń tar qubyrdyń ishine kirgenin kórýge bolady.
Arnaıy tartylǵan arqanmen jaǵdaıdy áriptesteri baqylap turǵan. Qubyr ishinen shyqqan sábıdiń jylaǵan daýsy kópshiliktiń degbirin alyp jatty.
Al, shuǵyl áreket etken qutqarýshylar, náresteni aman alyp qaldy. Qubyrdan shyǵaryp, jedel járdem qyzmetkerlerine qolyna tapsyrdy.
