Qubyrlardyń 87 paıyzy tozǵan: Pavlodardaǵy jylý jelileri mekemesi turǵyndardy abaı bolýǵa shaqyryp otyr
PAVLODAR. KAZINFORM — Oblys ortalyǵyndaǵy jylý jelileriniń jalpy uzyndyǵy 400 shaqyrymnan asady. Onyń shamamen 87 paıyzy tozǵan. Mamandar jerasty qubyrlarynda naqty qaı jerde apat bolatynyn aldyn ala boljaý múmkin emes ekenin aıtady.
«Pavlodar jylý jelileri» JShS málimetinshe, 400 shaqyrym qubyrdyń bir bóligi tutynýshylardyń balansynda bolsa, keıbiri jylý jelileri kásipornyna tıesili. Qazirgi ýaqytta qubyrlardaǵy sýdyń ortasha temperatýrasy shamamen 65 gradýs bolsa, qys mezgilinde bul kórsetkish 110 gradýsqa deıin jetedi. Osyǵan baılanysty jylý jelilerinde apat bolǵan jaǵdaıda turǵyndar úshin qaýip joǵary bolýy múmkin.
Kásiporyn basshysy Anatolıı Moıseıdiń aıtýynsha, jerasty qubyrlarynyń jaǵdaıyn tolyq baqylaý qıyn.
— Jylý jelileriniń uzyndyǵy 400 shaqyrymnan asady. Onyń ishinde tutynýshynyń balansyndaǵy dıametri 57 mıllımetrlik qubyrlar da, bizdiń balansymyzdaǵy dıametri 57 nemese 102 mıllımetrlik qubyrlar da bar. Jer astynda jatqan barlyq qubyrdy aldyn ala baqylaý múmkin emes. Olar kún saıyn tekserip otyratyn arnaıy arnada jatqan joq, — deıdi Anatolıı Moıseı.
Onyń aıtýynsha, turǵyndar jylý jelilerinde gıdravlıkalyq synaq júrgiziletin kezeńde ǵana emes, kúndelikti júrip-turý kezinde de saqtyq tanytýy qajet. Sebebi qubyrlardyń zaqymdanýy kez kelgen ýaqytta bolýy yqtımal.
Eske sala keteıik, buǵan deıin Pavlodarda jylý jelisindegi apat saldarynan er adam tórt jasar balasymen birge jer astyna qulap ketken bolatyn. Oqıǵa saldarynan 35 jastaǵy qala turǵynynyń denesi 7 paıyzy kúıip, jaraqat alǵan.
Oqıǵadan keıin «Pavlodar jylý jelileri» JShS ókilderi zardap shekken azamatpen kezdesip, ótemaqy tóleý jóninde kelisimge kelgen. Qazirgi ýaqytta onyń kásiporynǵa qatysty shaǵymy joq.
Atalǵan ýchaskedegi jylý jelisiniń zaqymdanýy qazir tolyq joıylyp, aýmaqtyń abattandyrylýy qalpyna keltirilgen.
