Qubyrdaǵy aqaý: Maıqaıyńǵa baratyn jeliniń bir shaqyrym bóligi qatyp qalǵan

PAVLODAR. KAZINFORM – Maıqaıyń kenti men «Bogatyr Kómir» AQ-ǵa sý jetkizetin qubyr boıyndaǵy aqaýdy qalpyna keltirý jumystaryn júrgizý ekinshi táýlikke ulasty. Kesheden beri muz qatqan 3 ýchaske anyqtaldy. Mundaı qubyr bólikteri arnaıy tehnıkamen qyzdyrylyp jatyr. 

Oblys ákiminiń baspasóz qyzmeti habarlaǵandaı, jeliniń jarylǵan jerlerinde qatty aıazdan muz qatyp qalǵan.

«Aqaý shyqqan qubyr bólikteri muz bop qatyp qalǵan. Qazirge deıin mundaı 3 ýchaske anyqtaldy, olardyń jalpy uzyndyǵy 1 shaqyrymdaı bolady. 600 metr jeli zerdelendi, tekserý sharaly áli de jalǵasýda. Qatyp qalǵan jerler arnaıy tehnıkamen qyzdyrylyp jatyr. Ázirshe qubyrlar aýystyrylǵan joq», - dep málimdedi oblys ákiminiń baspasóz qyzmetinen.

Qubyr boıymen sý óte tómen qysymda aǵyp jatyr. Belgili bolǵandaı, qazir Maıqaıyń kentin qamtamasyz etetin rezervýarda sýdyń kólemi jetkilikti. Sý tasıtyn mashınalar kesheden beri 460 tekshe metr sý jetkizgen. Al búginde túnde 180 tekshe metr, erteń taǵy 180-200 tekshe metr sý aparyp quıady dep josparlanyp otyr.

Eske sala keteıik, Ekibastuzdan Maıqaıyń kentine aýyzsý jetkizetin úlken qubyr jaryldy. 

Maıqaıyń kentiniń turǵyndary kúnine 1 myń tekshe metr aýyzsý tutynyp kelgen. Qazir qysymnyń tómendeýine baılanysty «Maıqaıyńaltyn» AQ sý tasıtyn mashınalardy jumyldyrdy.

Qubyrdaǵy aqaýǵa baılanysty «Bogatyr-Kómir» kásipornyna sý berý ýaqytsha toqtatyldy.

Maıqaıyńdaǵy rezervýarda eki táýlikke jetetin sý bar.