Qubyr zaqymdanǵan: Alataý qalasynyń shaǵyn aýdany gazsyz qaldy
ALMATY. KAZINFORM — Alataý qalasy, «Qoıanqus» shaǵyn aýdanynyń bir bóliginde gaz óshirildi.
Alataý ákimdiginiń málimetinshe, Qarasaı batyr kóshesi, 27 mekenjaıynda jeke tulǵa elektr berý jelisine arnalǵan beton tirekterin ornatý maqsatynda jer qazý jumystaryn júrgizgen. Alaıda olar orta qysymdy jerasty gaz qubyryn zaqymdaǵan.
— Qazir qaýipsizdikti qamtamasyz etý maqsatynda avarııalyq-dıspetcherlik qyzmet apattyq jaǵdaıdy jedel oqshaýlady. Zaqymdalǵan gaz qubyry ajyratylyp, gazdyń shyǵýyna jol bermeý boıynsha barlyq qajetti sharalar qabyldandy, — dep habarlady ákimdikten.
Qalpyna keltirý jumystary 29 shilde kúni tańǵy ýaqytta bastalmaq. Jóndeý-qalpyna keltirý jumystaryn «QazaqGaz Aimaq» AQ qyzmetkerleri júrgizedi.
— Aldyn ala málimet boıynsha, jumystardy aıaqtap, gazben jabdyqtaýdy tolyq qalpyna keltirý túske deıin josparlanyp otyr. Turǵyndardan ýaqytsha qolaısyzdyqtarǵa túsinistikpen qaraýdy suraımyz. Barlyq jaýapty qyzmetter gazben jabdyqtaýdy múmkindiginshe qysqa merzimde qalpyna keltirý úshin qajetti sharalardy qabyldap jatyr, — dep túsindirdi ákimdiktiń baspasóz qyzmeti.
Eske salaıyq, Almatynyń eki aýdanynda gaz ýaqytsha óshirildi.
