Kýbanyń eń qart turǵyny 126-shy týǵan kúnin atap ótti
ASTANA. 5 aqpan. QazAqparat - Kýbanyń eń qart turǵyny Hýana Baýtısta de la Kandelarııa Rodrıges hanym óziniń 126-shy týǵan kúnin dos-jarandary men týǵan-týystarynyń ortasynda atap ótti.
Kýbalyq jýrnalısterge bergen suhbatynda ol, áli de uzaq ómir súretindigine úmit bildirdi jáne Kýba kósemi Fıdel Kastroǵa uzaq ǵumyr tiledi, dep habarlaıdy ITAR-TASS agenttigi.
Jaqyndary Kandýlııa dep ataıtyn keıýana 1885 jyly 2 aqpanda araldyń shyǵysyndaǵy Kampechýela degen jerde dúnıege kelgen. Kópbalaly Rodrıgesterdiń otbasynda ekinshi bala - Kandelarııanyń 12 baýyry bolǵan. Taǵy bir aıta ketetin jaıt, keıýananyń anasy 100 jasynda, ákesi 96 jasynda dúnıeden ozǵan eken.
Biraz jasqa kelip qalǵanyna qaramastan, keıýana shóbere-shópshekterin baǵýǵa kómektesedi jáne jıi serýendeıdi. Janary sónip, teledıdar kóre almaǵanymen, jaqsy kóretin baǵdarlamalaryn tyńdaıdy eken. Kýba basylymdary, Rodrıges hanymnyń jer betindegi eń qart turǵyn ekenin aıtýda.
