Kýbada jas jigit akýlanyń qurbanyna aınaldy
ASTANA. QazAqparat - Kýba jaǵalaýynda shomylyp júrgen er adamǵa akýla shabýyl jasady.
Ázirge aty-jóni beımálim 22 jastaǵy jigit Gýardalakava jaǵajaıynan nebári úsh metr jerde ózge demalýshylarmen birge sýǵa shomylyp júrgen. Kenetten oǵan akýla shabýyl jasady. Janushyrǵan aıqaıdy estigen ózge jandar dereý kómekke umtyldy.
Olar zardap shekken azamatty teńiz jyrtqyshynyń qursaýdaı qysqan jaǵynan zorǵa bosatyp aldy. Ókinishke oraı, akýlanyń denege salǵan jarasy tym tereń bolyp shyqty.
Er adamdy shuǵyl aýrýhanaǵa jetkizgen. Biraq dárigerler kóp qan joǵaltqan jigitti ajaldan arashalap qala almady.
Bul Kýbada sońǵy 60 jyldyń ishinde akýlanyń adamǵa birinshi ret shabýyl jasaýy, dep jazady Daily Mail.
