Kýbada janarmaı daǵdarysyna baılanysty temeki jármeńkesi ótpeı qaldy

ASTANA. KAZINFORM — Jyl saıyn ótetin halyqaralyq kýbalyq sıgara jármeńkesi qatty janarmaı tapshylyǵyna baılanysty ótpeı qaldy, dep habarlaıdy Euronews.

Resmı málimdemede kýbalyq sıgaralardy eksporttaýǵa quqyǵy bar Habanos S.A. kompanııasy bul sheshimdi is-sharanyń joǵary deńgeıde uıymdastyrylýy men sapasyn qamtamasyz etý úshin qabyldanǵanyn atap ótti. Alaıda 26-shy ret ótkizilgeli otyrǵan jármeńkeniń qaı kúnge belgilengeni áli jarııalanǵan joq.

AQSh-tyń munaıǵa shekteý qoıýyna baılanysty Kýbada energııamen qamtamasyz etý qıyndyǵy týyndady. Elde ekonomıkanyń ártúrli salalaryna áser etken elektr qýatynyń máselesi uzaqqa sozylǵaly tur.

Mektepter men kásiporyndar jabylyp, aýrýhanalar energııa resýrstaryn únemdeý úshin jumys ýaqytyn qysqartty. El sońǵy onjyldyqtaǵy eń aýyr daǵdarystyń birin bastan ótkerip jatyr.

Portýgalııalyq Correio da Manhã gazetiniń habarlaýynsha, buǵan sebep Venesýela Kýbaǵa munaı jetkizýdi toqtatqan. El ekonomıkasy qıyn jaǵdaıda: elektr qýatynyń óshýi kásiporyndar men áleýmettik mekemelerdiń jumysyn kidirtip, týrızm salasyn toqytartty, áýe reısteri toqtatyldy. Jaqynda azyq-túlik tapshylyǵy týyndap, áleýmettik tolqýlar oryn alady degen qaýip bar.

Halyqaralyq sıgara jármeńkesi eldegi dástúrli sharalardyń biri. Qatysýshylar temeki plantatsııalaryna baryp, óndiris protsesterimen tanysady, mamandandyrylǵan aýktsıondarǵa jáne jańa ónimderdiń tusaýkeserlerine qatysady. Іs-shara jyl saıyn álemniń túkpir-túkpirinen kollektsıonerlerdi, dıstrıbıýtorlardy jáne sarapshylardy tartady.

Ótken jylǵy aýktsıon qolmen ılengen sıgaralardyń eksklıýzıvti partııalary úshin 18 mıllıon dollar kiris ákeldi. Habanos S.A. kompanııasynyń byltyrǵy jylǵy rekordtyq kirisi 827 mıllıon dollar boldy.