Kýbada shetel valıýtasynyń erkin aınalymy engizildi

ASTANA. KAZINFORM — Kýba bıligi ekonomıkany turaqtandyrý jáne kýba pesosynyń aıyrbas qabiletin qalpyna keltirý maqsatynda shetel valıýtasyn erkin aınalymǵa jiberý týraly sheshim qabyldady, dep jazdy AZERTADJ.

Qazirgi ýaqytta Kýbada dollardyń resmı bekitilgen baǵamy zańdy tulǵalar úshin 24 peso, al jeke tulǵalar úshin bankterde qolma-qol aqsha aıyrbastaý kezinde 120 peso deńgeıinde belgilengen. Alaıda 18 jeltoqsannan bastap Kýba Ortalyq banki shetel valıýtasyna degen suranys pen usynysqa negizdelgen erkin aıyrbas baǵamyn kún saıyn jarııalap otyratyn bolady.

Agenttik málimetinshe, bul sheshim resmı aıyrbas baǵamy men naryqtaǵy naqty qun arasyndaǵy aıqyn aıyrmashylyqtyń bar bolýyna baılanysty qabyldanǵan. Atalǵan alshaqtyq eldegi shetel valıýtasynyń tapshylyǵyn kórsetedi. Qazirgi kezde dollardyń «qara naryqtaǵy» baǵamy 400 pesodan asyp ketken.

Bılik ókilderiniń aıtýynsha, engizilip otyrǵan sharalardyń basty maqsaty — valıýtalyq naryqqa shetel valıýtasynyń kelýin yntalandyrý. Bul óz kezeginde naryqtyń qarjylandyrylýyn qamtamasyz etip, beıresmı valıýtalyq aınalymnyń úlesin azaıtýǵa múmkindik beredi.

Jyl basynda AQSh Kýbany terrorızmdi demeýshi memleketter tiziminen shyǵarǵan bolatyn.