Kýbada qazaq kúresi sektsııasy ashyldy
Kýbalyq aýyr salmaqtaǵy dzıýdoshy, Beıjiń Olımpıadasynyń qola júldegeri, «Álem barysy» Rene Braıson Vıdal Kýbada qazaq kúresi sektsııasyn ashyp, jeltoqsannyń 15-16 kúnderi Aqtóbede ótetin Álem chempıonatyna óz komandasymen keledi.
Kýbalyq Oskar Reneniń esimi qazaq kúresi jankúıerlerine jaqsy tanys. Birneshe jyl buryn ol «Álem barysyna» qatysyp, fınalda ádemi ádisimen chempıon atanǵan edi.
Búginde ol óz Otanynda osy sport túrin belsendi damytýda. Onyń aıtýynsha, qazaq kúresi – eń tartymdy jáne bolashaǵy jarqyn sport.
«Maǵan qazaq kúresi unaıdy. Tehnıkalary dzıýdoǵa uqsas. Meniń oıymsha, qazaq kúresiniń áleýeti zor», - deıdi Oskar Rene Braıson Vıdal.
Bıylǵy 15-16 jeltoqsan kúnderi Aqtóbede ótetin Qazaq Kuresi Álem chempıonatyna sportshy Kýba quramasynyń jattyqtyrýshysy retinde keledi.
Sonymen qatar, Álem chempıonatyna ırandyq dzıýdoshy, dzıýdodan álem chempıony Arash Mıresmaelı jáne Lı Von Hı de óz komandasymen birge keledi.
«Qazaq Kuresi halyqaralyq federatsııasynyń arqasynda qazaq kúresiniń damý geografııasy qarqyndy túrde keńeıýde. Qazirgi ýaqytta federatsııanyń quramynda 29 el bar. Olardyń qatarynda: Mońǵolııa, Ýkraına, Latvııa, Grýzııa, Polsha, Norvegııa, Estonııa, Irlandııa, Germanııa, Pákistan, Ózbekstan, Bolgarııa, Iran, Ispanııa, Qyrǵyzstan, Kıpr, Italııa, Slovenııa, Úndistan, Reseı jáne taǵy basqalar bar. Iran men Grýzııa elderinde balalarǵa arnalǵan klýbtar ashyldy» delingen habarlamada.
Qazaq kúresi búginde qarqyndy damý ústinde. Arnaıy keńes quryldy, qazaq kúresiniń erejelerine ózgerister engizildi, balýandar beldesetin kilem jaraqat jaǵynan qaýipsiz roll matqa aýystyryldy. Qoldanýǵa yńǵaıly, sapasy joǵary bul qalyń materıaldyń arqasynda kúrestiń dınamıkasy arta túspek.
Aqtóbe qalasynda ótetin Álem chempıonatyna 40-tan asa eldiń sportshylary qatysady. Olardyń qatarynda Ýkraına, Grýzııa, Aýstrııa, Norvegııa, Estonııa, Frantsııa, Irlandııa, Germanııa, Pákistan, Ózbekstan, Iran, Ulybrıtanııa, Qyrǵyzstan, Úndistan, Lıtva, Slovenııa, Reseı jáne basqalar bar.
Chempıonatta Ýkraına, Reseı, Qyrǵyzstan, Tájikstan, Grýzııa, Lıtva jáne Armenııa memleketterinen kelgen 8 tóreshi jáne óz elimizden 12 tóreshi tórelik etedi.
