Kýbada Fıdel Kastronyń atyn kóshege berýge tyıym salynady
ASTANA. QazAqparat - Kýba Úkimeti Fıdel Kastronyń qurmetine kóshe attaryn berýge jáne eskertkishter qoıýǵa tıym salady. Bul jeke basqa tabynýshylyqtan arylý úshin jasalynbaq, dep habarlaıdy dw.com.
Kýba Prezıdenti Raýl Kastronyń málimdeýinshe, onyń Úkimeti Fıdel Kastronyń atymen kósheler men qoǵamdyq oryndardy ataýǵa jol bermeıdi. Bundaı málimdemeni senbi kúni 3 jeltoqsanda qaraly mıtıngtegi sóılegen kezinde jasady.
Raýl Kastro Ulttyq assambleıanyń kelesi sessııasynda Fıdel Kastro dúnıeden ótkesin «mekemeler, kósheler, parkter, qoǵamdyq oryndar eshqashan onyń atymen atalmasyn» degen zań qabyldanatynyn atap ótti. Buǵan qosa, Fıdel Kastronyń qurmetine eskertkishter ornatylmaıdy.
Buǵan deıin habarlaǵanymyzdaı, Kýbada Fıdel Kastromen qoshtasý rásimi ótýde. Eldiń bas alańy Santıago-de-Kýbada ótip jatqan sharaǵa jarty mıllıonǵa jýyq adam qatysýda. Búgin marqumnyń órtelgen denesiniń kúli salynǵan qumyra Santa-Ifıgenııa zıratyna jerlenedi.
Eske sala ketsek, Kýba tókerisiniń kósemi Fıdel Kastronyń qaıtys bolýyna oraı aza tutý kúni toǵyz kúnge sozyldy. Ol jerleý rásimimen aıaqtalady. Bul týraly Kýba Respýblıkasy úkimetiniń saıty habarlaǵan bolatyn. Fıdel Alehandro Kastro Rýs Fıdel Kastro 25 qarashada 90 jasynda jergilikti ýaqytpen 22:29-da dúnıeden ozdy. Bul týraly onyń inisi Raýl Kastro memlekettik telearna arqyly málim etti.
