Kýbada áýe apatyna baılanysty ulttyq aza tutý kúni jarııalandy
ASTANA. QazAqparat - Kýba bıligi Gavana mańynda Boeing-737 ushaǵynyń qulaýyna baılanysty ulttyq aza tutý kúnin jarııalady. Bul jaıly Kýba Memlekettik keńesiniń málimdemesinde aıtyldy, dep habarlaıdy TASS.
«Juma kúni bolǵan áýe apatyna baılanysty Memlekettik keńes 19 mamyr, 06:00-den 21 mamyr 00:00-ge deıin resmı aza tutý kúnin jarııalaıdy», - delingen habarlamada. Qaraly kúnde búkil eldegi memlekettik týlar tómen túsiriledi.
Eske sala keteıik, keshe Kýbanyń Cubana de Aviacion áýe kompanııasy Meksıkanyń Global Air áýe kompanııasynan jalǵa alǵan Boeing-737 ushaǵy el astanasy Gavana áýejaıynan aspanǵa kóterilip, birer mınýttan soń apatqa ushyrady. Kýbanyń Olgın qalasyna reıske attanǵan ushaqtyń bortynda 104 adam bolǵan. Aldyn ala málimetterge qaraǵanda, olardyń barlyǵy qaza tapqan.
Ushaq áýejaı men Santıago-de-Las-Vegas eldi mekeniniń arasynda, Gavanadan ońtústikke qaraı shamamen 20 km jerge qulaǵan.
Foto: ria.ru
