Kýbada alapat quıynnan 3 adam qaza taýyp, 172 adam zardap shekti
ASTANA. QazAqparat - Kýba astanasy Gavanada jeksenbi kúni keshkisin alapat quıyn boldy. Tabıǵattyń tosyn minezinen 3 adam qaza taýyp, 172 adam zardap shekti, dep habarlaıdy QazAqparat Sınhýa agenttigine silteme jasap.
El prezıdenti Mıgel Dıas-Kanel Týıtterde Gavananyń quıynnan zardap shekken Regla aýdanyna barǵanyn málimdedi.
Onyń aıtýynsha, tabıǵı apat qalaǵa zor zalal keltirgen.
«3 adam qaza tapty, jaralanǵandar - 172. Birneshe brıgada qalpyna keltirý jumystaryn bastap ketti», - dep jazdy ol.
Kýba astanasynyń birneshe aýdany zardap shekken. Qalanyń basym bóligi jaryqsyz qaldy.
Áleýmettik jelide kýbalyqtar apattan qıraǵan úıler men ǵımarattardyń sýretterin bólisip jatyr.
Jeksenbide Gavanada nóser jaýyp, kúshti daýyl soqqan. Jaǵalaýdaǵy keı aımaqtar sý astynda qaldy. Quıynnyń jyldamdyǵy - saǵatyna 100 km shamasynda bolǵan.
