Kýbada 2,7 mln-nan astam turǵyn aýyzsýsyz qaldy
ASTANA. KAZINFORM – Kýbada energetıkalyq daǵdarys pen ınfraqurylymdaǵy aqaýlardyń saldarynan 2,7 mln-nan astam turǵyn aýyzsýǵa qol úzip qaldy, dep habarlaıdy Anadolu agenttigi.
Kýba Ulttyq sý resýrstary ınstıtýtynyń (INRH) málimetine súıensek, elektr energııasynyń óshýi men sý aıdaý stantsııalaryndaǵy tehnıkalyq aqaýlar el aýmaǵynda sýmen jabdyqtaý júıesiniń isten shyǵýyna ákelgen.
Vedomstvo elektr qýatynyń turaqsyz berilýi, ınfraqurylymnyń tozýy jáne tehnıkalyq apattar 2,7 mln-nan astam kýbalyqtyń sýmen qamtylýyna áser etkenin atap ótti.
Sonymen qatar Gavana astanasyn sýmen qamtamasyz etetin Cuenca Sur magıstraldyq sý qubyry jarylyp, qalanyń úsh aýdanyndaǵy shamamen 200 myń adam aýyzsýsyz qaldy.
Instıtýt energetıkalyq daǵdarystyń ýshyǵyp bara jatqanyna nazar aýdardy. Elektr qýatynyń úzilýine baılanysty sýmen jabdyqtaý júıelerinde qajetti qysymdy ustap turý múmkin bolmaı otyr.
Vedomstvo ókilderiniń aıtýynsha, tehnıkalyq aqaýlar joıylǵannan keıin de turǵyn úılerge sý berýdi qalpyna keltirý birneshe saǵatqa sozylýy múmkin.
Úkimet ınfraqurylymdyq jobalary
Daǵdarysty eńserý úshin Kýba bıligi 300-den astam ınfraqurylymdyq jobany iske asyrýdy jedeldetti. Sondaı-aq sý aıdaý stantsııalarynyń jumysyn qamtamasyz etý maqsatynda kún energetıkasy júıelerin ornatý bastaldy.
Alaıda qabyldanyp jatqan sharalar sýmen jabdyqtaý máselesin turaqty sheshýge ázirge múmkindik bermedi. El turǵyndary sýdyń berilýin uzaq ýaqyt kútýge májbúr.
Energetıkalyq daǵdarystyń áseri
2024 jyldyń ortasynan beri Kýba energetıkalyq ınfraqurylymnyń tozýy, uzaq jyldar boıy ınvestıtsııanyń jetkiliksiz bolýy jáne ekonomıkalyq qıyndyqtardyń tereńdeýi saldarynan kúrdeli energetıkalyq daǵdarysty bastan ótkerip keledi.
Qańtarda AQSh engizgen munaı embargosy jáne Vashıngton mamyrdan beri júrgizip kele jatqan «barynsha qysym kórsetý» saıasaty aıasyndaǵy sanktsııalar jaǵdaıdy odan ári ýshyqtyrdy.
Eske sala ketsek, buǵan deıin Kýbanyń ulttyq energetıkalyq júıesi bir apta ishinde ekinshi ret isten shyqqanyn jazyp edik.
