Kýbada 10 mıllıonǵa jýyq turǵyn jaryqsyz qaldy
ASTANA. KAZINFORM — Kýbada elektr qýaty qaıtadan óship, shamamen 10 mıllıon turǵyn jaryqsyz qaldy. Bul sońǵy bir jarym jyldaǵy Karıb aralyndaǵy jaryqtyń altynshy ret óshýi. Bılik bul daǵdarysty AQSh sanktsııalaryna baılanysty munaı jetkizýdiń keshiktirilýimen baılanystyrady, dep habarlaıdy DW.
Kýba Energetıka mınıstrligi el halqynyń shamamen jartysyn elektr qýatynsyz qaldyrǵan aqaýdyń sebepteri boıynsha tekserý júrgizip jatqanyn habarlady.
Kýbany eskirgen munaımen jumys isteıtin elektr stantsııalary arqyly jaryqpen qamtamasyz etiledi. Al Venesýela buryn onyń negizgi otyn jetkizýshisi bolǵan. Qańtar aıynyń basynda AQSh Venesýela prezıdenti Nıkolas Madýrony ustaǵannan soń, Donald Tramp bul eldiń munaıyn Kýbaǵa jetkizýdi toqtatty. Sondaı-aq aralǵa munaı satatyn nemese jetkizetin elderdiń barlyq taýarlaryna baj salyǵyn engizý týraly buıryqqa qol qoıdy.
Kýba bıligi úsh aıdan beri qajetti janarmaı almaǵanyn málimdedi. Gavana AQSh-pen jetkizilimderdi qalypqa keltirý úshin kelissózder bastalǵanyn habarlady.
Eske sala keteıik, eldegi elektr qýatynyń uzaqqa sozylǵan úzilisteri ekonomıkanyń túrli salalaryna áser etip úlgerdi. Mektepter men kásiporyndar jabylyp, aýrýhanalar energııa resýrstaryn únemdeý úshin jumys saǵatyn qysqartyp jatyr. Kýba sońǵy onjyldyqtardaǵy eń aýyr daǵdarystardyń birin bastan keshirip otyr.
El ekonomıkasy qıyn jaǵdaıda tur: elektr qýatynyń óshýi kásiporyndar men áleýmettik mekemelerdiń jumysyn toqtatty. Týrızm salasy zardap shegip, áýe reısteri toqtatyldy. Jaqynda azyq-túlik tapshylyǵy týyndap, áleýmettik tolqýlarǵa týdyrady degen qaýip bar.
Kýba prezıdenti Mıgel Dıas-Kanel úkimettiń janarmaı tapshylyǵyna daıyndalyp jatqanyn málimdedi. Ol sondaı-aq Donald Tramp ákimshiliginiń munaı jetkizilimderiniń qysqarýyna ákelgen sharalaryn aıyptady.