Kýba janarmaı tapshylyǵyna baılanysty sıgara jármeńkesin keıinge qaldyrdy

ASTANA. KAZINFORM — Kýba jyl saıyn ótetin ataqty sıgara jármeńkesin janarmaı tapshylyǵyna baılanysty keıinge qaldyrdy, dep habarlaıdy euronews.com.

Іs-sharany uıymdastyrýshy jáne kýbalyq sıgaralardy álem boıynsha satatyn monopolıst kompanııa — Habanos S.A. — bul sheshim «sharanyń joǵary sapa standarttaryn saqtaý» maqsatynda qabyldanǵanyn málimdedi. 26-shy jármeńkeniń ótetin kúni ázirge jarııalanǵan joq.

Janarmaı daǵdarysy AQSh-tyń munaı embargosymen baılanysty bolyp otyr. Sońǵy aptalarda elde elektr qýatynyń uzaq ýaqytqa óshýi jıilegen. Osyǵan baılanysty bılik birqatar mádenı is-sharalardy, sonyń ishinde kitap jármeńkesin de keıinge qaldyrdy.

Sıgara jármeńkesi — álemniń túkpir-túkpirinen keletin sıgara áýesqoılary men dıstrıbıýtorlar úshin mańyzdy oqıǵa. Qatysýshylar temeki plantatsııalaryn aralap, aýktsıondarǵa qatysyp, saladaǵy sońǵy jańalyqtarmen tanysady.

Ótken jyly ótken aýktsıonda qoldan shıyrylǵan tańdaýly sıgaralar partııasy 18 mıllıon dollarǵa satylǵan. Kompanııa 2025 jyly satylym kólemi 827 mıllıon dollarǵa jetip, rekord ornatqanyn habarlaǵan.

Janarmaı tapshylyǵy týrızm salasyna da keri áserin tıgizdi: keıbir týrıstik agenttikter saparlardy toqtatty, al úkimet elektr energııasyn únemdeý úshin qonaqúılerdi ýaqytsha jaýyp, týrısterdi basqa oryndarǵa kóshirýge májbúr boldy.

AQSh prezıdenti Donald Tramp qańtar aıynyń sońynda Kýbaǵa munaı satatyn kez kelgen elge tarıf engizýi múmkin ekenin eskertken. Vashıngton osylaısha araldaǵy kommýnıstik bılikke saıası jáne ekonomıkalyq reformalar júrgizý úshin qysym kórsetip otyr.

Kýba energııa resýrstarynyń shamamen 60%-yn ımporttaıdy. El uzaq ýaqyt boıy Venesýela men Meksıka jetkizetin munaıǵa táýeldi bolyp kelgen, alaıda bul jetkizilimder de AQSh áreketteriniń saldarynan buzylǵan.

Budan buryn AQSh tarapynan blokadaǵa ushyraýynan energetıkalyq daǵdarystyń ýshyǵýy aıasynda gýmanıtarlyq kómek tıelgen Meksıka áskerı-teńiz kúshteriniń eki kemesi Kýba jaǵalaýyna toqtaǵanyn jazdyq.