Kýba sheteldik áýe kompanııalaryna avıakerosın tapshylyǵy týraly eskertti

ASTANA. KAZINFORM – Kýba bıligi sheteldik áýe kompanııalaryna eldegi áýejaılarda avıakerosın tapshylyǵyna baılanysty ushaqtarǵa ýaqytsha janarmaı quıý múmkin emestigin habarlady. Bul týraly EFE agenttigine silteme jasap DW jazdy.

Aqparatqa sáıkes, shekteýler 10 aqpannan bastap kúshine enip, keminde naýryz aıynyń ortasyna deıin saqtalýy múmkin. Avıakerosın tapshylyǵy eldiń birneshe áýejaıynda, sonyń ishinde Gavanadaǵy Hose Martı atyndaǵy halyqaralyq áýejaıda baıqalyp otyr.

Kýba bıligi áýe tasymaldaýshylarǵa el aýmaǵynda qosymsha janarmaı quıýǵa senýge bolmaıtynyn eskertken. Bul sheteldik avıakompanııalardyń reıs baǵyttaryn, kestesin jáne ushý jıiligin qaıta qaraýyna alyp kelýi múmkin.

EFE málimetinshe, Kýbadaǵy janarmaı tapshylyǵy AQSh tarapynan qysymnyń kúsheıýinen keıin ýshyǵa túsken. Qańtar aıynyń sońynda AQSh prezıdenti Donald Tramp Kýbaǵa munaı jetkizetin elderge qatysty jańa tarıftik júıe engizý týraly jarlyqqa qol qoıǵan.

Aq úı bul sheshimdi Kýba bıliginiń AQSh ulttyq qaýipsizdigine qater tóndiredi jáne jaý memleketter men toptarmen yntymaqtasady degen ýájben túsindirgen. Osy jaǵdaıdan keıin aralǵa janarmaı jetkizý kólemi qysqaryp, áýe kemelerin otynmen qamtamasyz etý qıyndyqqa tap bolǵan.

Reseılik BAQ málimetinshe, 9 aqpanda «Rossııa» áýe kompanııasynyń Máskeý – Gavana baǵyty boıynsha reısi sońǵy sátte toqtatylǵan. Ushaq ekıpajynyń komandıri Kýba áýejaıynda janarmaı joq ekenin habarlaǵan.

EFE agenttiginiń jazýynsha, Kýbanyń týrızm salasy pandemııadan keıin de daǵdarysty kezeńdi bastan ótkerip otyr. AQSh sanktsııalary men ishki ekonomıkalyq qıyndyqtar jaǵdaıdy odan ári kúrdelendirgen.