Kýba prezıdenti aýqymdy reformalar paketin jarııalady

Memlekettik telearnaǵa bergen suhbatynda ol bul ózgeristerdiń AQSh qysymymen emes, ekonomıkany jandandyrý, basqarýdaǵy shamadan tys ortalyqtandyrýdy azaıtý jáne túrli salalarǵa kóbirek derbestik berý maqsatynda qolǵa alynǵanyn aıtty.

Prezıdenttiń sózinshe, reformalar týrızm, ınvestıtsııa jáne syrtqy saýda salalaryn da qamtıdy.

— Elimiz bir orynda turǵan joq. Biz qazirgi jaǵdaıǵa aqylmen jaýap berip jatyrmyz. Atqaryp jatqan jumystarymyzdyń barlyǵyn ashyq aıta almaımyz, óıtkeni qarsy tarap ár qadamymyzdy baqylaýda ustap otyr. Bizdiń jaýabymyz — birlik pen aýyzbirshilik bolýy tıis, — dedi Dıas-Kanel.

Aldaǵy aptalarda reformalar paketi Kýba Kommýnıstik partııasy Saıası bıýrosynyń qaraýyna usynylady. Keıin ony eldiń bir palataly parlamenti — Halyq bıliginiń ulttyq assambleıasy qaraıdy.

Reformalardyń negizgi baǵyttary

• Aýyl sharýashylyǵy óndirýshilerine kóbirek erkindik beriledi;

• Syrtqy saýdada memlekettik kompanııalardyń mindetti deldaldyq qyzmeti joıylady;

• Avtokólik ımporttaýǵa qoıylǵan shekteýler jeńildetiledi;

• Sheteldik ınvestıtsııalardy tartý kúsheıtiledi;

• Shetelde turatyn kýbalyqtarǵa el azamattarymen teń quqyqtar beriledi;

• Memlekettik apparat yqshamdalyp, mınıstrlikter sany 27-den 20-ǵa deıin qysqarady;

• Taýarlardy jappaı sýbsıdııalaý júıesi birtindep toqtatylyp, áleýmettik kómek tikeleı muqtaj azamattarǵa baǵyttalady.

Týrızm salasynda jańa kezeń

Reformalar aıasynda Kýba týrızm naryǵyn jańa bıznes úlgileri men ınvestorlarǵa ashýdy kózdep otyr. Bul sheshim AQSh sanktsııalaryna baılanysty birqatar sheteldik kompanııalardyń elden ketýi aıasynda qabyldandy.

Ispanııalyq Melia Hotels International jáne Iberostar, kanadalyq Blue Diamond Resorts men ındonezııalyq Archipelago International maýsym aıynda Kýbadaǵy qyzmetin tolyq nemese ishinara toqtatatynyn málimdegen.

Bul jaǵdaı áskerı holdıng quramyndaǵy Gaviota basqaratyn kóptegen qonaqúılerdiń bolashaǵyna qatysty belgisizdik týǵyzdy.

Týrızmdegi daǵdarys

Kýbanyń týrıstik salasy COVID-19 pandemııasynan beri kúrdeli kezeńdi bastan ótkerip keledi. Al bıyl AQSh sanktsııalarynyń kúsheıýi sheteldik týrıster sanynyń kúrt azaıýyna áser etti.

Kýbanyń Ulttyq statıstıka jáne aqparat basqarmasynyń málimetine sáıkes, jyldyń alǵashqy tórt aıynda elge 328 608 sheteldik týrıst kelgen. Bul ótken jyldyń osy kezeńimen salystyrǵanda 55,8 paıyzǵa az. Sáýir aıynda Kýbaǵa nebári 30 551 sheteldik týrıst barǵan.

Aıta keteıik, jaqynda AQSh Kýbaǵa qarsy jańa sanktsııalar engizdi.