Kýba prezıdenti AQSh-pen kelissóz júrgizýge daıyn

ASTANA. KAZINFORM – Kýba prezıdenti Mıgel Dıas-Kanel AQSh-pen talqylanatyn máselelerdiń uzaq tizimi bar ekenin jáne onyń eli kez kelgen másele boıynsha, biraq qysymsyz nemese alǵyshartsyz, el egemendigin qurmetteı otyryp dıalog júrgizýge daıyn ekenin málimdedi, dep habarlaıdy NBC News. 

Kýba prezıdenti úkimettiń kúrdeli otyn tapshylyǵyna daıyndalyp jatqanyn jarııalap, Tramp ákimshiliginiń aralǵa munaı jetkiziliminiń azaıýyna ákelgen sharalaryn aıyptady.

– AQSh sııaqty derjavanyń elge qatysty osyndaı qylmystyq saıasat júrgizip, azyq-túlik, kólik, aýrýhanalar, mektepter, ekonomıkalyq óndiris jáne bizdiń ómirlik mańyzdy júıelerimizdiń qyzmetine áser etýi ersi, - dep málimdedi Mıgel Dıas-Kanel.

Dıas-Kanel kýbalyqtarda «jek kórý sezimi joq ekenin» jáne Soltústik Amerıka halqynyń qundylyqtaryn bólisetinin atap ótti. Alaıda Kýba prezıdenti «qorǵanys josparyn» ázirlep jatqanyn málimdep, Kýba – beıbitshilikti súıetin el jáne AQSh-qa esh qaýip tóndirmeıtinin atap ótti. 

– Biz soǵys jaǵdaıynda emespiz, biraq áskerı jaǵdaıǵa ótýge májbúr bolatynymyzǵa daıyndalyp jatyrmyz, - dep habarlady Mıgel Dıas-Kanel. 

Eske sala ketsek, buǵan deıin AQSh prezıdenti Donald Tramp Kýbaǵa munaı jetkizýshi elderden keletin taýarlarǵa jańa tarıf engizemiz dep qorqytyp, kommýnısterdiń baqylaýyndaǵy aralǵa qysym jasaýyn kúsheıtti. 

Buǵan deıin Donald Tramp Kýbadan ulttyq qaýipsizdikke tóngen qaýipke baılanysty tótenshe jaǵdaı jarııalady. 

Sondaı-aq AQSh prezıdenti Kýbamen kelissózderdiń bastalǵany týraly habarlaǵanyn jazdyq.