Kýba men Bolıvııa Venesýela prezıdenti Madýrony qoldady

ASTANA. KAZINFORM — Kýba men Bolıvııa úkimetteri Venesýela prezıdenti Nıkolas Madýroǵa qoldaý bildirip, AQSh-tyń onyń ustalýyna arnalǵan syıaqyny 50 mıllıon dollarǵa deıin arttyrý týraly sheshimine jaýap berdi, dep habarlaıdy Anadoly.

Kýba prezıdenti Mıgel Dıas-Kanel X áleýmettik jelisindegi jazbasynda AQSh-ty synǵa aldy.

Ol AQSh-tyń bul sheshimi halyqaralyq quqyq qaǵıdattaryna qaıshy keletinin alǵa tartty.

— AQSh úkimeti zańdy saılanǵan Venesýela prezıdenti Nıkolas Madýroǵa qarsy qoldanylyp jatqan birjaqty jáne zańsyz sharalardy negizdeý úshin ózin halyqaralyq tóreshi retinde kórsetýge umtylyp jatyr, — dep jazdy Kanel.

Al Bolıvııa prezıdenti Lýıs Arse X áleýmettik jelisinde AQSh-tyń Madýroǵa qatysty málimdemesin «qabyldaýǵa kelmeıtin» áreket dep baǵalady.

— AQSh úkimetiniń baýyrymyz, prezıdent Nıkolas Madýroǵa jasaǵan bul shabýylyn aıyptaımyz. Demokratııalyq jolmen saılanǵan prezıdentke syıaqy jarııalaý — bul otarlyq dáýirdiń qaldyǵy. Bul — Venesýelanyń jáne bizdiń halyqtardyń egemendigi men ar-namysyna jasalǵan soqqy, — dedi Arse.

Aıta keteıik, AQSh úkimeti Madýronyń ustalýyna nemese sottalýyna septesetin aqparat úshin burynǵy 25 mıllıon dollar kólemindegi syıaqyny 50 mıllıon dollarǵa deıin arttyrǵanyn jarııalady.

AQSh Memlekettik departamentiniń habarlaýynsha, bul aqparattyq usynys jańartylǵan.

Sonymen qatar, AQSh Madýrony 2024 jylǵy saılaýdyń jeńimpazy retinde moıyndamaıtynyn jáne ony Venesýelanyń zańdy prezıdenti dep tanymaıtynyn málimdedi.