Kýba Madýronyń 32 qorǵaýshysynyń qazasyna baılanysty aza tutý kúnin jarııalady
ASTANA.KAZINFORM - AQSh prezıdenti Donald Tramp Venesýela prezıdenti Nıkolas Madýrony tutqyndaý operatsııasy kezinde birneshe kýbalyq qaýipsizdik qyzmetkeriniń qaza tapqanyn málimdedi, dep habarlaıdy BBC.
- Keshe kóptegen kýbalyq qaza tapty, - dedi Tramp Air Force One bortynda tilshilerge.
Kýba bıligi 32 adamnyń qaza tapqanyn habarlady. Reuters agenttiginiń habarlaýynsha, elde 5 jáne 6 qańtar aza tutý kúni dep jarııalandy.
Senbi kúni AQSh Venesýelaǵa qarsy operatsııa bastap, prezıdent Nıkolas Madýro men onyń áıelin tutqyndady. Keıinirek AQSh prezıdenti Donald Tramp Venesýela prezıdenti men onyń áıeli kememen Nıý-Iorkke jetkiziletinin jarııalady.
Venesýela prezıdenti Nıkolas Madýro men onyń áıeli Sılııa Floreske esirtki terrorızmin uıymdastyrdy, kokaın ımporttady jáne AQSh-qa qarsy pýlemetter men jarylǵysh qurylǵylar saqtaý isin uıymdastyrdy degen aıyp taǵyldy. Olar jaqyn arada sot aldynda jaýap beredi, dep habarlady AQSh Bas prokýrory Pem Bondı.
3 qańtarda Florıdadaǵy Mar-a-Lago rezıdentsııasynan Venesýeladaǵy operatsııa jáne Latyn Amerıkasy eliniń bolashaǵy týraly sóılegen sózinde Tramp ótpeli kezeń aıaqtalǵanǵa deıin AQSh eldi ózi basqaratynyn málimdedi.
Buǵan deıin BUU Bas hatshysy jáne birneshe eldiń bıligi AQSh-tyń Latyn Amerıkasy eline jasaǵan aýqymdy shabýylynan keıin Venesýeladaǵy jaǵdaıǵa alańdaýshylyq bildirgen bolatyn.
BUU Qaýipsizdik Keńesi dúısenbide Venesýela boıynsha tótenshe otyrys ótkizedi.
