AQSh-tyń qysymy: Kýba taǵy da jaryqsyz qaldy
ASTANA. KAZINFORM — Kýbanyń elektr jelisi taǵy da tolyq isten shyqty. Apat AQSh tarapynan qysymnyń kúsheıýi aıasynda boldy, dep habarlaıdy DW.
Apat AQSh ákimshiliginiń Gavana bıligine ekonomıkalyq jáne saıası qysymdy kúsheıtýi aıasynda boldy. Kýba ózine qajetti otynnyń nebári 40%-yn ǵana qamtamasyz ete alady. 2026 jyldyń qańtarynan beri AQSh aralǵa tek naýryz aıynyń sońynda bir reseılik tanker arqyly munaı jetkizýge ruqsat bergen. Alaıda 730 myń barrel munaı qory mamyr aıyna qaraı tolyq taýsylǵan.
Bloomberg agenttiginiń málimetinshe, AQSh-tyń sanktsııalyq shekteýleri shamamen 10 mıllıon halqy bar Kýbadaǵy elektr energııasynyń sozylmaly tapshylyǵyn odan ári ýshyqtyrǵan. Mamyr aıynda el bıligi otyn qorynyń tolyq taýsylǵanyn habarlaǵan.
Sońǵy birneshe aıda Kýba turǵyndary elektr júıesindegi iri aqaýlarǵa birneshe ret tap boldy. Naýryz aıynyń ortasynda búkil el birneshe saǵat boıy jaryqsyz qalsa, mamyrda osyndaı jaǵdaı Kýbanyń shyǵys óńirlerinde qaıtalandy. Elektr energııasyn únemdeý maqsatynda úkimet josparly túrde jaryqty óshirip otyrady, mundaı shekteýler keıde bir táýlikke deıin sozylady.
Daǵdarystan shyǵý úshin Kýba bıligi aýqymdy reformalardy qolǵa aldy. Onyń ishinde sońǵy 65 jyldaǵy eń iri ekonomıkany ishinara jekeshelendirý bastamasy bar. 2026 jylǵy maýsymda el basshylyǵy Vashıngtonnyń otynǵa qatysty shekteýlerin alyp tastaýǵa qol jetkizý maqsatynda 200-ge jýyq naryqtyq reformany usyndy.
Alaıda Kýba men AQSh arasyndaǵy kelissózder tuıyqqa tireldi. Bloomberg málimetinshe, AQSh prezıdenti Donald Tramp ekonomıkalyq jáne saıası qysym arqyly Kýbada AQSh-qa jaqyn úkimettiń bılikke kelýine yqpal etýdi kózdeıdi.
Aıta keteıik, Vashıngton Kýbaǵa qarsy sanktsııalaryn keńeıtti. Bul prezıdent Mıgel Dıas-Kanel men Raýl Kastronyń otbasy múshelerine áser etti.
