Kýba áskeri AQSh tarapynan bolýy múmkin agressııaǵa daıyndalyp jatyr
ASTANA. KAZINFORM – Kýba bıligi eldiń qarýly kúshteri AQSh tarapynan bolýy múmkin áskerı agressııaǵa daıyndalyp jatqanyn málimdedi, dep habarlaıdy Kazinform agenttiginiń Vashıngtondaǵy menshikti tilshisi.
Bul týraly Kýba syrtqy ister mınıstriniń orynbasary Karlos Fernandes de Kossıo jýrnalısterge bergen suhbatynda aıtty.
– Bizdiń qarýly kúshter árdaıym daıyn. Qazirgi kúnderi de yqtımal áskerı agressııaǵa daıyndyq júrgizip jatyr. Álemdegi jaǵdaıdy eskersek, qaqtyǵys bolýy múmkin ekenin joqqa shyǵarý ańǵaldyq bolar edi, – dedi ol NBC News telearnasyna bergen túsiniktemesinde.
Fernandes de Kossıo Kýba basshylyǵy mundaı jaǵdaıdyń bolmaǵanyn qalaıtynyn atap ótti.
– Biz munyń bolmaǵanyn shyn júrekten qalaımyz. Onyń ne sebepti bolýy kerek ekenin túsinbeımiz jáne oǵan eshqandaı negiz kórip otyrǵan joqpyz, – dedi ol.
Ol sondaı-aq AQSh prezıdenti Donald Tramptyń «Kýbany basyp alý baqyty buıyrdy» degen sózine jaýap berdi.
– Biz olardyń ne aıtyp otyrǵanyn túsinbeı otyrmyz. Biraq bir nárseni naqty aıta alamyn: Kýba – táýelsiz memleket jáne táýelsiz memleket bolyp qalýǵa tolyq quqyǵy bar, – dedi Kýba SІM ókili.
Kýbalyq sheneýnik eki el arasyndaǵy kelissózderde bılikti ózgertý máselesi múlde talqylanbaǵanyn da aıtty.
– Kýba úkimetiniń sıpaty, onyń qurylymy jáne músheleri eshqandaı kelissózdiń taqyryby bola almaıdy. Eshbir táýelsiz memleket mundaı máseleler boıynsha kelissóz júrgizbeıdi, – dedi Karlos Fernandes de Kossıo.
AQSh pen Kýba arasyndaǵy shıelenis AQSh-tyń Venesýeladaǵy áskerı operatsııasynan keıin kúsheıe tústi. Onyń nátıjesinde osy eldiń prezıdenti Nıkolas Madýro bılikten ketken bolatyn. Ol Kýba basshylyǵymen tyǵyz baılanysta bolǵan.
Buǵan deıin Donald Tramp Kýbany «kesh bolmaı turǵanda» AQSh-pen kelisim jasaýǵa shaqyrǵan.
23 naýryz kúni Donald Tramp Iranǵa qarsy soqqylardy ýaqytsha toqtatý týraly da málimdedi. Bul sheshim Vashıngton men Tegeran arasyndaǵy «nátıjeli kelissózder» týraly habarlamalardan keıin qabyldanǵan.
