Kýba alynbaıtyn tas qamal emes - Nurlan Aqúrpekov
Jaqynda otandastarymyz Búkilálemdik boks serııasynyń (WSB) jetinshi maýsymyndaǵy jartylaı fınalda brıtanııalyq «Brıtısh Laınharts» klýbymen eki jekpe-jeginiń qorytyndysy boıynsha 7:3 esebimen utyp, taǵy da fınalǵa shyqty.
Endi sheshýshi synda otandastarymyz kýbalyq «Kýba Domadores» komandasymen chempıondyq ataqty sarapqa salady. Osyǵan oraı, «Astana arlandarynyń» bas jattyqtyrýshysy Nurlan Aqúrpekovti áńgimege tartyp, boksshylardyń daıyndyǵy jaıynda shaǵyn suhbat alǵan edik.
- Ótkende ǵana suhbat berip, Alla qalasa,fınalǵa shyqsaq,ulttyq quramadan kómek suraımyz dep edińiz. Jalpy fınalǵa daıyndyqtaryńyz qalaı?
- Iá, súrinbeı fınalǵa jettik. Endi chempıon ataný ǵana qaldy. Eger bıyl taǵy da chempıon bolsaq, Búkilálemdik boks serııasy tarıhyna «Arlandardyń» esimi altyn áriptermen jazylaıyn dep tur. Bul joba júzege asqaly bizdeı jetistikti eshqandaı komanda qaıtalaǵan emes. Biz - qazirdiń ózinde eń kóp júldeger atanǵan komandamyz. Al «altyn» áriptermen tarıh paraǵyna qalý úshin bizge ulttyq quramanyń kómegi aýadaı qajet. Alaıda, bul másele áli sheshilmeı jatyr. Al óz boksshylarymyz kúndelikti jattyǵýlaryn oıdaǵydaı jasap jatyr.
- Ulttyq quramanyń kómegine ne kedergi bolyp jatyr?
- Olardyń kúntizbelik kestesi bizge sáıkes bolmaı jatyr. Búkilálemdik boks serııasynyń negizgi jospary boıynsha fınaldyń alǵashqy aıqasy osy aıdyń 24-i kúni Kýbada ótýi tıis. Al qarymta kezdesý 1 shildede Qazaqstanda ótedi delingen. Ulttyq qurama týra osy ýaqytta 10 kúndik oqý-jattyǵýǵa Túrkııaǵa ketedi eken.
- Endi ne istemek oıdasyzdar?
- Qazir Búkilálemdik boks keńesine hat jazyp, fınaldyń ýaqytyn ózgertýge usynys jasasaq degen oıdamyz. Biraq, olar kelise me, kelispeı me ol jaǵy belgisiz. Biraq. ulttyq quramadan kómek bolmasa da báribir judyryqtasamyz. Sheginerge jol joq.
- Kýba boksshylary sonshalyqty myqty ma?
- Kýba boksshylary alynbaıtyn tas qamal emes. Osyǵan deıin jolyqtyq. 2015 jyly týra osy kýbalyqtarmen fınalda jolymyz túıisip, chempıondyq ataqqa biz qol jetkizgenbiz. Sol jetistiktiń kezdeısoq emes ekenin dáleldep, bıyl da olardan aılamyzdy asyrsaq dep qoldan kelgen jumysty jasap jatyrmyz. Bárin sharshy alań kórsetedi. Buıyrǵanyn kóremiz.
- Bıyl chempıon bolsaq, «Arlandardyń» esimi altyn áriptermen jazylady dep jatsyz. Ótken jetistikterge qysqasha toqtalyp, oqyrman qaýymnyń esine qaıtalap túsire ketseńiz...
- Elordamyzda qurylǵan «Arlandarymyz» 2013 jáne 2015 jyldary chempıon atandy. 2013 jyly Ýkraına boksshylaryn utsaq, 2015 jyly bıylǵy qarsylasymyz Kýbany qapy qaldyrdyq. Al alǵashqy 2011 jyly fınalda Frantsııa boksshylaryna bir ǵana esep aıyrmashylyǵymen ese jiberip, kúmis medaldi qanjyǵaǵa baıladyq. 2012, 2014 jáne 2016 jyldary úzdik úshtikti túıindep, qola medalǵa qol jetkizdik. Mine, bıyl taǵy fınalǵa shyǵyp turǵanymyzdy eskersek, júldesiz qalǵan jylymyz joq ekenin kórýge bolady. Dúnıejúzilik boks serııasy jobasynda jeńip alǵan júldeler jaǵynan eshbir komanda qazaqstandyq «Astana arlandarynyń» shalymyna jetpeıdi.
- Eger fınalda ulttyq quramadan kómek bolmasa, óz boksshylaryńyzdan kimderge úmit artasyzdar?
- Áli kimderdiń judyryqtasatynyn anyqtaǵan joqpyz. Boks federatsııasynyń basshylyǵy ulttyq quramadan bizge kómek berýge kelise me, kelispeı me, birinshi osy máseleni sheship alǵan soń baryp, kimderdiń judyryqtasatynyn anyqtaıtyn bolamyz.
- Áńgimeńizge rahmet!