Kýba AQSh-tyń talabymen 36 saıası tutqynǵa bostandyq berdi
ASTANA. QazAqparat - Kýba bıligi túrmeden 36 oppozıtsııa belsendisin bosatty, dep habarlaıdy VVS.
Saıası tutqyndardyń bostandyqqa shyǵýyn AQSh sońǵy ýaqytta Vashıngton men Gavana arasyndaǵy qarym-qatynastyń ońala túskeni arqasynda talap etken. Aq úı ókiliniń habarlaýynsha, AQSh Kýba bıliginiń bul sheshimine rızashylyq tanytyp, aldaǵy ýaqytta qalǵan 53 saıası tutqyndy da bosatady dep esepteıdi. Osydan 1 aı buryn AQSh pen Kýba 1961 jyldan beri úzilip qalǵan dıplomatııalyq baılanysty qaıta qalpyna keltirýge daıyn ekendigin habarlaǵan. 21 aqpanda kelesi raýndaǵy kelissózder ótpek, onda Vashıngton men Gavanada elshilikter ashý máselesi talqyǵa salynady.
