Kýba AQSh-ty aralda gýmanıtarlyq daǵdarys týǵyzýǵa árekettendi dep aıyptady
ASTANA. KAZINFORM — Kýbanyń Syrtqy ister mınıstri Brýno Rodrıges Parrılıa BUU Bas Assambleıasy 81-sessııasynyń jalpy saıası pikirtalasynda AQSh-tyń Kýbaǵa qysymy buryn-sońdy bolmaǵan deńgeıge jetkenin málimdedi, dep habarlaıdy BUU jańalyqtar qyzmeti.
Onyń aıtýynsha, 2026 jyldyń qańtarynan bastap Vashıngton shekteýlerdi odan ári kúsheıtip, aralǵa is júzinde «energetıkalyq blokada» ornatqan jáne basqa elderden otyn jetkizýge kedergi keltirip otyr.
Ekonomıkalyq soǵys halyqqa baǵyttalǵan
Rodrıgestiń aıtýynsha, AQSh-tyń sharalary Kýbanyń syrtqy ekonomıkalyq baılanystarynyń is júzinde barlyq salasyna — azyq-túlik pen dári-dármek jetkizýden bastap týrızmge, ınvestıtsııalarǵa, qarjylandyrý men tehnologııalarǵa qol jetkizýge deıin áser etip otyr.
Onyń sózinshe, ártúrli porttarda 7 myńnan astam konteıner buǵattaýly tur. Olardyń kópshiliginde azyq-túlik, dári-dármek jáne medıtsınalyq jabdyqtar bar. Kýba mınıstriniń málimdeýinshe, Vashıngton sheteldik kompanııalar men úkimetterge de qysym kórsetip, olardyń Gavanamen saýda jáne yntymaqtastyq baılanystaryn shekteýge tyrysyp otyr.
— Ekonomıkalyq soǵys halyqqa baǵyttalǵan, — dedi Rodrıges.
Onyń aıtýynsha, sanktsııalardyń saldaryn «janama zalal» dep qaraýǵa bolmaıdy: olar qajetti taýarlardyń tapshylyǵyna ákelip, Kýba otbasylaryna qıyndyq týǵyzýda. Mınıstr AQSh-ty aralda gýmanıtarlyq daǵdarys týǵyzyp, ekonomıkalyq qysym arqyly bıliktiń aýysýyna qol jetkizýge tyrysty dep aıyptady.
AQSh málimdemesine jaýap
Kýba SІM basshysy AQSh prezıdenti Donald Tramptyń Bas Assambleıadaǵy jýyrdaǵy sózinde Kýbany «sátsiz memleket» dep ataýyna da jaýap berdi.
— Eger bul ras bolsa, onda nege otyn blokadasyn engizý kerek? Nege ekinshi deńgeıli sanktsııalar salý kerek? Nege planetadaǵy basqa memleketterdiń barlyǵyna qoqan-loqy kórsetip, qýdalap, qysym jasaý kerek? — dep surady Rodrıges.
Ol sondaı-aq Kýbaǵa qarsy áskerı kúsh qoldaný qaýpi saqtalyp otyrǵanyn aıtyp, mundaı qadam halyqaralyq quqyqty buzý bolatynyn eskertti.
— Bul eshqashan bolmaıdy dep úmitteneıik. Kýba ózin-ózi qorǵaýǵa qatysty zańdy quqyǵyn bar tabandylyǵymen paıdalanatyn bolady, — dedi mınıstr.
BUU-ny saqtaý jáne nyǵaıtý qajet
Rodrıges sóziniń edáýir bóligin halyqaralyq júıeniń qazirgi jaǵdaıyna arnady. Onyń aıtýynsha, memleketterdiń egemendik teńdigi qaǵıdaty jáne halyqaralyq quqyqtyń basqa da negizderi búginde turaqty qysymǵa ushyrap otyr. Sonymen birge mınıstr Kýba Birikken Ulttar Uıymyn álsiretýdi emes, kerisinshe nyǵaıtýdy qoldaıtynyn atap ótti.
— Biz Birikken Ulttar Uıymyn saqtaý jáne nyǵaıtý qajet ekenine senimdimiz, — dedi ol. Sondaı-aq BUU-nyń demokratııashyl, tıimdi ári halyqqa jaqyn uıymǵa aınalýy kerektigin aıtty.
Rodrıges Taıaý Shyǵystaǵy jaǵdaıǵa da qatysty pikir bildirip, Izraıldiń palestınalyqtarǵa qatysty áreketterin aıyptady. Sondaı-aq Iranǵa qarsy áskerı is-qımyldar men Venesýela tóńiregindegi jaǵdaıdy sóz etti. Onyń aıtýynsha, bolyp jatqan oqıǵalar halyqaralyq tártiptegi keń aýqymdy daǵdarysty kórsetedi. Mundaı jaǵdaıda BUU Jarǵysynyń qaǵıdattarynyń ornyna kúsh pen ekonomıkalyq qysym barǵan saıyn jıi qoldanylyp keledi.
Kýba mınıstri 66 jyl buryn Bas Assambleıa minberinen Fıdel Kastro aıtqan, adamzat soǵys fılosofııasy, otarshyldyq pen halyqtardy qanaý joıylǵan kezde ǵana «shynaıy progreske» qol jetkize alady degen sózderdi eske saldy.
Aıta ketelik AQSh Kýbaǵa qarsy jańa sanktsııalar engizgen edi.
