Qýatty Armııa - qýatty Qazaqstan!

Aǵymdaǵy jyly Otan qorǵaýshy kúni barsha qazaqstandyqtar úshin erekshe ótti desek te bolady. Dál osy kúni 21 jyl ishinde tolysyp, zamanaýı qarý-jaraqpen jaraqtanǵan Qarýly kúshterimiz «Otar» 40-shy áskerı bazasynda jaýyngerlik parad ótkizip, óz áleýetin pash etti. El tarıhyndaǵy tuńǵysh Jaýyngerlik paradqa 7 myń sarbaz, 400 áskerı tehnıka, 80 ushaq pen tikushaq qatysty. Sharanyń ashylý rásiminde el Prezıdenti - QR Qarýly Kúshteriniń Joǵarǵy Bas Qolbasshysy Nursultan Nazarbaev barsha qazaqstandyqtardy merekemen quttyqtady. «Qurmetti otandastar! Ofıtserler men sarbazdar! Búgin - shebi bútin, shekarasy berik qasıetti Qazaq jerin qorǵaıtyn Qarýly Kúshterimizdiń qurylǵan kúni. Bıyldan bastap biz 7 mamyrdy memlekettik mereke retinde atap ótetin bolamyz. Men barsha qazaqstandyqtardy, sarbazdarymyzdy Otan qorǵaýshy kúnimen shyn júrekten quttyqtaımyn! Bul - batyr babalardyń dańqty joly men Otanǵa adal qyzmet etý dástúrin toǵystyratyn meıram. Atalarymyz aq bilektiń kúshimen, aq naızanyń ushymen osy ulanǵaıyr jerdi qorǵap, bizge muraǵa qaldyrdy. Sonyń arqasynda búginde táýelsiz memleket quryp, ony órkendetip kelemiz. Qazaqtyń qaharman uly Baýyrjan Momyshuly «Óz elin maqtanysh etpeý - satqyndyqpen teń» degen. Bul dúnıede bizdiń bir ǵana Otanymyz bar, ol - Táýelsiz Qazaqstan. Qasterli otanymyzǵa qaltqysyz qyzmet etý jáne ony qorǵaý - árbir azamattyń qasıetti boryshy. Osynaý perzenttik paryzymyzdy biz, ásirese áskerı adamdar adal atqarýǵa tıistimiz! Sonda ǵana biz armanymyzǵa jetip, Máńgilik el bola alamyz», - dedi Memleket basshysy óz sózinde.

Elbasynyń atap ótýinshe, jyl saıyn Qazaqstannyń Qarýly Kúshteri dalalyq jerlerde jedel jáne áskerı daıyndyq boıynsha 250-den astam is-shara ótkizedi. Al áskerı parad sol barlyq daıyndyq sharalarynyń sharyqtaý shegi bolyp sanalady. Sonymen qatar, bul - Qazaqstan armııasy áskerı bólimsheleriniń kásibı mashyǵynyń, úılesimdiligi men múmkindikteriniń is júzindegi kórinisi. «Bul kúni, 7 mamyrda sardarlar men sarbazdar naǵyz patrıot jáne ózderiniń jaýyngerlik isiniń maıtalmandary ekenin is júzinde dáleldep beredi. Olardyń aıbyndy ári órshil urany - «Qýatty Armııa - qýatty Qazaqstan!», - dedi QR Prezıdenti.

N.Nazarbaev Qazaqstan óz armııasyn maqtan tutatyndyǵyn, ony nyǵaıtý úshin qoldan kelgenniń bárin jasaıtyndyǵyn basa aıtty. Elbasynyń sózine qaraǵanda, Qarýly Kúshter osy zamanǵy tehnıkamen jaraqtandyrylýda. Basqarý júıesine jańa tehnologııalar men avtomattandyrylǵan basqarý tetikteri qarqyndy engizilýde. Áskerı garnızondarda sport keshenderi, turǵyn úıler men jataqhanalar salynýda. Áskerı qalashyqtardy josparly túrde kóriktendirý júrgizilýde. Qazaqstannyń áskerı qyzmetshileri qazir laıyqty qarjylyq ıgilikke ıe bolyp otyr.

«Armııanyń tártibi aýyr desedi, biraq bul aýyrtpalyq - el qorǵaý beıneti, qıynshylyq beıneti emes. Armııa - bizdiń egemendi memleketimizdiń berik qalqany. Ony nyq ustap turý - tek qasıetti borysh qana emes, zor mártebe! Sizderdiń qyzmetterińiz - elimizdiń Táýelsizdiginiń, Qazaqstannyń ár shańyraǵynyń tynyshtyǵy men alańsyzdyǵynyń kepili. Men áskerı qyzmetshilerdi, ardagerlerdi jáne barsha qazaqstandyqtardy Otan qorǵaýshy kúnimen quttyqtaımyn! Ózderińizge densaýlyq, qyzmetterińiz ben eńbekterińizge, jaýyngerlik daıarlyqtaryńyzǵa tabys tileımin! 7 mamyr bizdiń memleketimizdiń qýaty men senimdiligin árqashan aıǵaqtap turatyn kún bolsyn! Aıbynymyz árdaıym asqaq, baıraǵymyz qashanda bıik bolsyn! Táýelsizdigimiz tuǵyrly, eldigimiz ǵumyrly bolsyn! Qazaqstan jasasyn!»,- dep qorytty sózin Ult kóshbasshysy.

Osydan keıin jaýyngerlik parad ótip, kókke zymyrandar ushyryldy, bombalar laqtyrylyp, qarýdyń barlyq túrinen oq-dáriler atyldy. Sý-25, Mıg-29, Sý-27, L-39 jáne ózge de ushaqtar men Qazaqstanda qurastyrylǵan tikushaqtar kórsetildi. «Jetisý» jáne «Suńqar» toptary ushý máneriniń joǵary sheberligin pash etti. Sondaı-aq «Airbus Military» C-295 týrbınaly-vıntti ushaqtardan áýe desantshylary sekirdi. Áýe qorǵanysy kúshteriniń áýe shabýylyna qarsy qorǵanysyn kórsetý úshin áýedegi nysanalar boıynsha S-125 zenıtti-zymyrandy keshennen zenıtti basqarylatyn zymyrandar jiberildi. Sonymen qatar, Mańǵystaý oblysynan Kaspıı teńizindegi "Kazaqstan" zymyrandyq-artıllerııalyq kemeniń urys júrgizý tásilderi tikeleı monıtordan kórsetildi. Paradqa Qarýly Kúshterdiń, ІІM Іshki áskerleriniń, áskerı oqý oryndarynyń, sondaı-aq UQK Shekara qyzmetiniń, TJM-niń bólimsheleri jáne Respýblıkalyq gvardııanyń saltanatty batalony qatysty.

Uly Jeńiske - 68 jyl!

Keshe Elbasy Nursultan Nazarbaev elordadaǵy Otan qorǵaýshylar monýmentine gúl shoqtaryn qoıyp, Uly Otan soǵysynda qaza bolǵan jaýynger qazaqstandyqtardy bir sát únsizdikpen eske aldy. Osydan keıin Memleket basshysy arnaıy tigilgen shatyrlar qalashyǵyna kelip, ardagerlermen áńgimelesti.

Sońynda BAQ ókilderine suhbat bergen QR Prezıdenti: «Barsha qazaqstandyqtardy Uly Jeńis merekesi - 9 mamyr kúnimen shyn júregimmen quttyqtaımyn. Jeńistiń bolǵan kezi bizden alystaı bergen saıyn onyń qadiri men qasıeti óse beredi. Bul surapyl soǵysqa 1 mıllıon 800 myń qazaqstandyq attanyp, sonyń teń jartysy qan maıdannan qaıtpady. Sondyqtan qazaqstandyqtardyń birneshe urpaǵy árdaıym bul jeńisti este saqtaıtyn bolady. Ardagerler aramyzda barǵan saıyn azaıyp barady, endeshe olardy qurmettep, qadirin jaqsy túsinýimiz kerek. Olar erlik, tatýlyq, birlik kórsetti»,-dedi. Nursultan Nazarbaev Jeńis kúniniń halyqtyń birligin, tynyshtyǵyn, turaqtylyǵyn bildiretin sımvoldyq máni baryn, bul elimizdiń eń basty jetistigi ekenin atap kórsetti.

«Biz azamattarymyzdy soǵys otynan saqtaı bilýimiz qajet. Búginde, ókinishke qaraı, «ystyq núktelerden» jetken aqparattyq málimetter dál bir maıdan dalasynan jetkendeı áser etedi. Elimizde Táýelsizdik jyldary ishinde beıbitshilik, dostyq jáne kelisim saltanat quryp keledi. Osynyń bárin saqtaýymyz kerek, ótken soǵystyń tájirıbesi sony kórsetedi. Biz beıbitshiliktiń qadirin tereń túsinýge tıispiz. Eger atalarymyz sol kezde jeńiske qol jetkizbegen bolsa, biz búgingi táýelsizdikti kórer me edik, kórmes pe edik. Bostandyǵymyz ben táýelsizdigimizdi baǵalaı bilýimiz kerek, al jastar ardagerlerge árqashan qamqor bolýǵa tıis. Óz kezeginde, memleket te olarǵa jan-jaqty kómek kórsetedi jáne ony odan ári jalǵastyra beredi», - dep atap ótken Memleket basshysy ár ardagerdiń otbasyna amandyq-saýlyq, baq-bereke, zor densaýlyq tilep, Uly Jeńistiń 70 jyldyǵyn olarmen birge atap ótetinine senimin bildirdi.

Qazaqstan men Túrkimenstan óńirdegi strategııalyq áriptester

Búgin Aqordada Qazaqstan Respýblıkasynyń Prezıdenti Nursultan Nazarbaev pen elimizge memlekettik saparmen kelgen Túrkimenstan Prezıdenti Gýrbangýly Berdimuhamedov shaǵyn jáne keńeıtilgen quramdaǵy kezdesýler ótkizip, odan keıin birlesken málimdemege qol qoıdy. Sondaı-aq ekijaqty kezdesýler qorytyndysy boıynsha Qazaqstannyń Syrtqy ister mınıstri Erlan Ydyrysov pen Túrkimenstan Mınıstrler Kabıneti tóraǵasynyń orynbasary-Syrtqy ister mınıstri Rashıd Meredov eki vedomstvo arasyndaǵy yntymaqtastyq týraly hattamany, sondaı-aq 2013-2014 jyldarǵa arnalǵan yntymaqtastyq týraly baǵdarlamalardy rásimdese, Qazaqstannyń Ulttyq ǵylym akademııasy men Túrkimenstan ǵylym akademııasy arasynda yntymaqtastyq týraly kelisim jasaldy. Budan bólek yntymaqtastyq týraly hattamaǵa «Qazaqstan temir joly» UK basshysy men Túrkimenstan temirjol kóligi mınıstri qol qoıdy.

Osydan keıin eki eldiń basshylary birlesken málimdeme jasady. «Baýyrlas Túrkimenstan Prezıdenti Gýrbangýly Berdimuhamedovke meniń shaqyrtýymdy qabyl alyp, Qazaqstanǵa kelgeni úshin zor rızashylyǵymdy bildiremin. Búgingi joǵary deńgeıdegi kezdesýimiz asa nátıjeli boldy. Sebebi, eki eldiń arasynda burynnan qalyptasqan dástúrli qarym-qatynas bar. Biz kórshiles memlekettermiz. Tarıhymyz da, dinimiz de, tilimiz de bir. Halqymyz da aralasyp keledi. Sonymen birge eki eldiń bir-birine degen qarym-qatynasy, senimi óte joǵary»,-dedi N. Nazarbaev.

Sonymen qatar Elbasy jeke quramdaǵy jáne jalpy delegatsııamen kelissózder barysynda birqatar mańyzdy máseleler talqylanǵanyn atap óte kele: «Halyqaralyq jáne óńirlik máselelerge barynsha kóńil bóldik. Ásirese, Aýǵanstan, Iran, Kaspıı teńiziniń máselesine nazar aýdardyq. Qazaqstan men Túrkimenstan arasyndaǵy dostyq baılanystardy damytý, saýda-sattyq, mádenı qatynastardy joǵary deńgeıge kóterý jaıy qaraldy. Búgingi qol qoıylǵan qujattar sonyń barlyǵyn sheshetinine senim mol»,-dedi.

Memleket basshysynyń atap ótýinshe, eki el Prezıdentteriniń kelissózderi barysynda Túrkimenstandaǵy Qazaqstan kúnin jáne Qazaqstandaǵy Túrkimenstan kúnderin ótkizý, Zııalylar forýmy men iskerler forýmyn ótkizý týraly kelisimge kelgen. Eki eldiń jastaryn Qazaqstan men Túrkimenstan joǵary oqý oryndarynda oqytý da qarastyrylǵan. Túrkimenstannan Qazaqstan arqyly Qytaıǵa jetkiziletin gaz tasymaldaý júıesiniń búgingi qýaty 40 mlrd. tekshe metr bolsa, bolashaqta onyń ótkizý qýatyn úshinshi jelide 60 mlrd. tekshe metrge jetkizýge kelisken. Sondaı-aq Aqtaýda Túrkimenstannyń, al Túrkimenbashyda Qazaqstannyń konsýldyǵyn ashý ýaǵdalastyǵyna qol jetkizilgen.

Óz kezeginde búgingi kelissózder Túrkimenstan men Qazaqstannyń baýyrlas eki halyq arasyndaǵy tatý kórshilik baılanystardyń úzdiksiz nyǵaıýy ústinde ekendigin qýattaı túskendigin basa aıtqan G.Berdimuhamedov: «Biz Qazaqstanmen teń quqyly ári ózara tıimdi ustanymdar negizinde qarqyndy ári turaqty damyp kele jatqan qarym-qatynasymyzdyń ahýalyn joǵary baǵalaıtyndyǵymyzdy atap ótkim keledi. Bizdiń ózara saýda aınalymymyz úzdiksiz artýda, mádenı, ǵylymı, gýmanıtarlyq jáne basqa da salalardaǵy baılanystarymyz keńeıýde. Biz Qazaqstanmen qarym-qatynasymymyzǵa erekshe mán beremiz, ony ózimizdiń basymdyqty áriptesterimizdiń biri retinde qarastyramyz, men muny basa aıtqym keledi», - dedi.

Túrkimen basshysynyń atap ótýinshe, óıtkeni eki eldi ǵasyrlarǵa ulasqan tatý kórshilik, ortaq mádenıet pen til baılanystyryp otyr. Sonymen qatar Túrkimenstan bul baǵa jetpes qundylyqty saqtaýǵa ári búgingi kúnniń talaptaryna jaýap beretin jańa mazmunmen tolyqtyra túsýge nıetti.

G.Berdimuhamedovtyń aıtýynsha, búgingi kelissózder barysynda eki el basshylary Aýǵanstandaǵy jaǵdaıdy retteý, Kaspıı pen Aral teńizin qutqarýdaǵy ózara is-qımyldar syndy barynsha ózekti máselelerde ózara túsinistik tanytatyndyǵyn taǵy bir márte qýattaı túsken.