Qýat Raxımberdın: Saılaý zańnamasynyń jańa normalary demokratııalyq qoǵamnyń damyǵanyna dálel
Bul týraly ol Óskemen qalasynda ótken «Saılaý-2021: mańyzy men erekshelikteri» atty sarapshylar keńesiniń otyrysynda aıtty.
«Qalyptasý men damýdyń uzaq kezeńderinen ótken saılaý quqyǵyna birqatar ózgerister men tolyqtyrýlar engizildi. Bul rette, saılaý zańnamasyndaǵy jańa normalardyń mańyzy zor. Endi okrýgtik saılaý komıssııalary taratylyp, aýmaqtyq komıssııalardyń tóraǵalary, orynbasarlary nemese hatshylary turaqty túrde jumys isteıdi. Bul ýchaskelik saılaý komıssııalarynyń saılaý naýqanyna daıyndyǵyn edáýir jeńildetedi. Jańashyldyqtar ýchaskelik komıssııalardy da aınalyp ótpedi. Ondaǵy múshelerdiń sany okrýgtaǵy saılaýshylar sanyna baılanysty ózgerip otyrady», - dedi Qýat Raxımberdın.
Onyń aıtýynsha, jańa zańǵa sáıkes úmitkerdiń jubaıy jáne jaqyn týystary saılaý komıssııalarynyń quramyna kire almaıdy.
«Eń negizgi ózgeristerdiń biri – saılaýda áıelder men jastarǵa 30 paıyzdyq kvotanyń berilýi bolyp otyr. Nátıjesinde bılik basynda jańa kózqarastar, erekshe bastamalar paıda bolady. Sonymen qatar saılaý partııalyq tizim boıynsha ótkizilmek. Osylaısha partııalar túrli kandıdattardan tek kil júırikterdi iriktep, saılaýǵa jiberedi. Bul partııa bılik pen qoǵam arasyndaǵy dáneker ispetti bolady degen sóz. Qoryta ketsem, Memleket basshysy Qasym Jomart Toqaevtyń «Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýtsııalyq zańǵa jáne «Qazaqstan Respýblıkasy Parlamentiniń komıtetteri men komıssııalary týraly» zańǵa túzetýler engizýi elimizdegi demokratııalyq qoǵamnyń damyǵanyna dálel», - dedi zań ǵylymdarynyń doktory.
Óz sózinde ol jurtshylyqqa belsendilik tanytyp, saılaýdan qalys qalmaýǵa shaqyrdy.
