Qýat Mashyryqov: Dárigerge qurmet — adam ómirine, ult densaýlyǵyna qurmet

AQTAÝ. KAZINFORM — Medıtsına qyzmetkerleriniń qaýipsizdigin qamtamasyz etýge baǵyttalǵan jańa zań — qoǵam úshin mańyzdy ári ıgilikti qadam. Bul zańnyń qabyldanýyn Mańǵystaý óńiriniń tájirıbeli dárigeri, medıtsına ardageri Qýat Mashyryqov zor rızashylyqpen qabyldap, Memleket basshysyna alǵys hat joldady, dep habarlaıdy oblys ákimdiginiń baspasóz qyzmeti.

Ol bul sheshimdi aq halatty jandardyń eńbegine berilgen naqty baǵa dep sanaıdy. 44 jylǵa jýyq ǵumyryn medıtsına salasyna arnaǵan ardager dárigerdiń aıtýynsha, jańa zań eń aldymen dárigerdiń mártebesin kóterip, olardyń alańsyz, senimdi jaǵdaıda qyzmet etýine múmkindik beredi.

— Dáriger úshin eń bastysy — naýqasqa bar yntasymen, kásibı turǵyda kómek kórsetý. Al qaýipsizdik qamtamasyz etilgen jerde jaýapkershilik te, senim de arta túsedi. Bul zań medıtsına qyzmetkerlerine úlken qoldaý, — deıdi Qýat Mashyryqov.

Ardager dáriger jańa zańnyń qabyldanýy medıtsına salasyna tyń serpin beretinin atap ótti. Onyń aıtýynsha, mundaı sheshim dárigerlerdiń jumysqa degen yntasyn arttyryp qana qoımaı, qoǵamdaǵy ózara syılastyqty nyǵaıtady.

— Dáriger adam ómiri úshin kúresedi, kún saıyn úlken jaýapkershilikpen jumys isteıdi. Memleket tarapynan osyndaı qoldaý kórsetilýi — dáriger eńbeginiń laıyqty baǵalanǵanynyń belgisi, — deıdi ol.

Zańnyń taǵy bir mańyzdy tusy — dáriger men patsıent arasyndaǵy senimdi kúsheıtý. Qýat Mashyryqov bul rette qoǵamda túsinistik pen mádenı qarym-qatynastyń orny erekshe ekenin aıtady.

— Ózara syılastyq bolǵan jerde ǵana sapaly medıtsına qalyptasady. Bul zań soǵan jol ashady, — deıdi sala ardageri.

Qýat Mashyryqov — Asfendııarov atyndaǵy Almaty memlekettik medıtsına ýnıversıtetiniń 1982 jylǵy túlegi, mamandyǵy — stomatolog. Ol eńbek jolynda hırýrg-stomatolog, ortoped-stomatolog, sondaı-aq bas dáriger qyzmetterin abyroımen atqarǵan. Ózen jáne Aqtaý qalalarynda uzaq jyldar boıy qyzmet etip, óńir halqynyń densaýlyǵyn nyǵaıtýǵa zor úles qosty.

Zeınet jasyna shyqsa da, ardager dáriger medıtsınadan qol úzgen emes. Búginde ol jas mamandarǵa baǵyt-baǵdar berip, tájirıbesimen bólisip keledi.

— Bul mamandyqta eń basty qundylyq — bilim men tájirıbe. Sol ekeýi úzdiksiz izdenispen ushtasqanda ǵana nátıje bolady, — deıdi ol.

Ardager dáriger búgingi medıtsınanyń, ásirese stomatologııa salasynyń qarqyndy damýyn erekshe maqtanyshpen aıtady. Kompıýterlik tehnologııalar, tsıfrlyq júıeler, ımplantatsııa, tsırkonıı koronkalar — munyń bári otandyq medıtsınanyń jańa deńgeıge kóterilgenin kórsetedi.

— Buryn qolmen jasalǵan dúnıeler qazir avtomattandyrylǵan júıe arqyly oryndalady. Bul — ýaqyt talaby, ári úlken múmkindik, — deıdi Qýat Mashyryqov.

Ol aldaǵy ýaqytta otandyq medıtsınalyq materıaldar óndirisi damysa, salanyń áleýeti odan ári arta túsetinine senimdi. Ardager dáriger jas áriptesterine de aqjarma tilegin jetkizdi.

— Únemi bilimdi jetildirip, tájirıbe almasyp otyrý kerek. Eń bastysy — adamgershilik. Ár naýqasty jaqynyńdaı qabyldap, shynaıy qyzmet etseń, halyqtyń alǵysy da, senimi de artady, — deıdi ol.

Sóz sońynda Qýat Mashyryqov Memleket basshysyna medıtsına salasyna kórsetilip jatqan jan-jaqty qoldaý úshin alǵysyn bildirip, bul bastamalardyń el bolashaǵy úshin mańyzdy ekenin atap ótti.

— Dárigerge qurmet — adam ómirine, ult densaýlyǵyna degen qurmet. Osyndaı ıgi qadamdar arqyly medıtsına salasynyń abyroıy arta beretinine senemin, — dep túıindedi ol.