«Qýat» korporatsııasynyń qurylys nysandaryn aıaqtaý úshin Qazkommertsbank Strestik aktıvter qorynan 20 mıllıard teńge aldy
ALMATY. Jeltoqsannyń 10-y. QazAqparat /Erlik Erjanuly/ - Keshe Qazkommertsbank Astana men Almaty qalalaryndaǵy «Qýat» korporatsııasynyń turǵyn úı nysandarynyń qurlysyn aıaqtaý úshin Strestik aktıvter qory arqyly memleketten 20 mıllıard teńge aldy,
dep habarlaıdy QazAqparat banktiń baspasóz qyzmetine silteme jasap.
Bul qarajat depozıt túrinde ornalastyrylady. Bank sondaı-aq, «Global Building Contract» jobalaý kompanııasy úshin nesıe jelisin ashty. Ol Almatydaǵy "Saıran" megaýdanyndaǵy 46, 29 kvartaldar men "Úsh tóbe" jáne Astanadaǵy "Grand Alataý" kópsalaly turǵyn úı keshenderin salýdy jáne ózge de keshenderdiń jobalyq-smetalyq qujattaryn jasaýdy qarjylandyrýǵa baǵyttalǵan.
Buǵan deıin qarashanyń 11-i kúni Almaty qalasynyń ákimdigi men "Samruq-Qazyna" ulttyq ál-aýqat qory arasynda yntyaqtastyq týraly memorandýmǵa qol qoıylǵan edi. Memorandýmda Almaty qalasyndaǵy úlestik turǵyn úı nysandary men "Saıran" kóp salaly turǵyn úı keshenderininiń qurylysyn aıaqtaý úshin memleket bıýdjetinen 75 mıllıard teńge bólý qarastyrylǵan bolatyn. Jalpy, ótken jyly Qazkommertsbank memlekettik baǵdarlamadaǵy nysandar qurlysynyń iri qatysýshysy boldy. Banktiń qarjylandyrýymen Almatyda segiz nysannyń beseýiniń qurylysy aıaqtalyp, 800 úleskerdiń máselesi sheshildi. Bul -"Keremet", "Naýaı", "Buhar jyraý", "Shahrıstan" jáne "Rııal Almaty" dep atalatyn turǵyn úı keshenderi.
