Qýat Hamıtov jekpe-jekke shaqyrǵan Ámirhan Tileýovke jaýap berdi
ASTANA. QazAqparat - MMA-nyń qazaqstandyq tanymal sportshysy Qýat «Naıman» Hamıtov ózin jekpe-jekke shaqyrǵan Ámirhan Tileýovke jaýap berdi, dep habarlaıdy «Kazınform» ІІM tilshisi.
MMA sheberi otandasynyń sharshy alańda kezdesý týraly usynysyna eski támsilmen jaýap qatqan.
«Men bylaısha jaýap bereıin: Bir kúni arystanǵa ıt kelip, ony shaıqasqa shaqyrady. Biraq arystan oǵan nazaryn da aýdarmapty. Sonda ıt: «Eger sen menimen tóbelespeseń, men barlyq dostaryma arystannyń menen qorqatynyn aıtyp beremin», - depti. Arystan sonda: «Ittermen tóbelesip júr eken degenshe, ıtterden jasqanady eken» dep aıta bersin degen eken. Meni kim shaıqasqa shaqyrǵanyn estimedim. Biraq kim bolsa da, menimen betpe-bet keletin adam laıyqty qarsylas bolsyn! Álemniń úsh dúrkin chempıony jáne Azııa men Qytaıdyń úzdik sportshysy kim kóringenmen judyryqtasa bermeıdi», - dedi sportshy.
Shabýylǵa shaqyrýdyń túpki sebebi Qýat Hamıtovtyń qazaqstandyq fýtbolshylarǵa aıtqan synynan shyqqan edi. Ol tusta «Naıman» eldegi fýtboldy damytýǵa bólinetin qarajattyń jelge ushyp ketip jatqanyn jazǵan edi.
«Astana» men «Seltık» arasyndaǵy ekinshi oıynnyń qorytyndysy Qýat Hamıtovtyń oıyn ózgerte almapty.
«Bul oıynnyń nátıjesi birinshi matchta-aq sheshilip qoıǵan. Ekinshi kezdesýge jańadan oınap júrgender, ıaǵnı qosalqy quram kelgen. Sondyqtan, aqymaqtardyń basqasynan bári de «Seltıktiń» bul matchqa qyzyǵýshylyq tanytpaıtynyn bildi. Jalpy alǵanda, barlyq jýrnalıster men fýtbol jankúıerlerine aıtarym bar: Sizder Álem kýbogy dárejesine jetken kezde ǵana maǵan fýtbol týraly suraq qoısańyzdar eken», - dedi «Naıman».
Budan buryn qazaqstandyq boksshy Ámirhan Tileýov «Naıman» atty laqap aty bar Qýat Hamıtovty 26 tamyzda Sháripova men Kolevanyń arasynda ótetin shoýda kezdesýde shaqyrǵan bolaty. Boks keshi «EKSPO-2017» halyqaralyq kórmesindegi Amfıteatrda uıymdastyrylmaq.
