Qýat Dombaı: Qazaqtyń Mark Tvenderi qaıda?
ALMATY. QazAqparat - «Altyn qalam» ádebı baıqaýynyń uıymdastyrý komıtetiniń múshesi Qýat Dombaı qazaqtyń Mark Tvenderi men Charlz Dıkensterin izdeıtinin aıtty, dep habarlaıdy QazAqparat tilshisi.
Ádebıet salasyndaǵy «Altyn qalam» táýelsiz baıqaýyn uıymdastyrýshylardyń biri, Qazaqstandaǵy tuńǵysh PR-mamandardyń biri Qýat Dombaı qazaq ádebıetin damytý úshin janrlardy, kitapty satý boıynsha promoýshndi qolǵa alý kerek ekenin aıtty.
«Qazir fantastıkalyq shyǵarmalarǵa, jasóspirimderge arnalǵan ádebıet pen shytyrman hıkaıalarǵa qurylǵan detektıv, romandarǵa oqyrman suranysy bar ekenin baıqaımyz. Qazir qazaq ádebıeti jańǵyrý satysynda tur. Bizde ádebı suranysty beretin ıntellektýaldyq orta bar. Mysaly, mektep baǵdarlamasynda qazirgi qazaq ádebıeti degen bólim bar. 20 ǵasyrdaǵy emes, 21 ǵasyrdaǵy qazaq ádebıeti kerek mektepke. Qazaqtyń Mark Tveni, Charlz Dıkensteri qaıda? Qazaq detektıvteri qaıda? Qazaq ádebıetine promoýshn kerek, ony qoǵamǵa jetkize bilý jańa zaman talaby. Biz «Altyn qalamdy» uıymdastyrý arqyly osy olqylyqtardy, jasóspirimder ádebıetiniń avtorlaryn izdeımiz», - degen maman qazaq ádebıetine memleket tarapynan qoldaý jetispeıtindigin tilge tıek etti.
«Máselen, Úndistanda ádebıet salasynda baspalardyń barlyǵy salyqtan bosatylǵan. Memleket nege «joqtan» aqsha alýy kerek. Máselen, qazaq tildi kitaptan paıda joq bolsa, baspalarǵa 16 paıyz salyq salýdyń qandaı qajeti bar? Import kitaptardan salyq alsyn, al biraq qazaq ádebıeti salasyndaǵy baspagerlerden ne úshin salyq alady? Memleket qazaq ádebıetinen qarjylyq paıda kórýdi oılamaýy kerek. Memleket jaǵdaı jasaı otyryp, qoldaýy kerek. Degenmen, qazaq tildi kitaptarǵa degen suranys artyp keledi. Qazaq tildi oqyrman buryn 300 teńgelik jýrnaldy satyp alsa, qazir 2000-3000 teńgeniń kitaptaryn satyp alyp oqıdy», - dedi Qýat Dombaı.
