Qýanyshbek Esekeev Qazaqstan Dzıýdo federatsııasynyń prezıdenti bolyp saılandy
Astanada Qazaqstan dzıýdo federatsııasynyń bir jylǵy jumysy qorytyndylandy. Bas qosý aıasynda salany jandandyra túsý úshin federatsııanyń prezıdenti laýazymyna «Qazaqtelekom» AQ Basqarma tóraǵasy Qýanyshbek Esekeev saılandy.
Federatsııa basshysynyń kandıdatýrasyn kezekti konferentsııada daýys bergen barlyq 16 qatysýshy biraýyzdan qoldady. Osy jaýapty laýazymǵa laıyqty dep «Qazaqtelekom» AQ Basqarmasynyń tóraǵasyn tańdaý beker emes, Qýanyshbek Esekeev óziniń negizgi qyzmetinen bólek, otandyq sportpen baılanysty birneshe qurylymdarda jumystar istegen.
Aıta keteıik, 2018 jyly Qazaqstanda kıbersport resmı qyzmetin bastaǵan sátten beri Esekeev myrza qazaqstandyq Kıbersport federatsııasyn basqardy. Onyń basshylyǵymen osy Federatsııa qysqa merzim ishinde turaqty túrde ótetin ulttyq týrnırlerdiń tutas jelisin qurdy. Budan basqa, Qazaq CyberSport Federation qysqa merzimde qazaqstandyq jáne halyqaralyq týrnırlerdi ótkizý úshin qajetti ınfraqurylym qalyptastyrdy. Sonymen qatar «Qazaqtelekom» AQ Basqarma basshysy «Qazaqstan Barysy» qazaq kúresin qoldaý jáne damytý qoǵamdyq qorynyń qamqorshylyq keńesiniń tóraǵasy boldy.
«Balýandyq dástúri joǵary deńgeıde qalyptasqan Qazaqstan halqy úshin dzıýdo óneri de jat emes. Barshamyz bilemiz, elimizde balýandyq ónerdiń tarıhy tereń, árige barmaı-aq jaýyryny jerge tımegen Qajymuqan, Balýan Sholaq atalarymyzdan bastap, búginde álemdik deńgeıde top jarǵan talaı túıe balýandarymyzdy aýyz toltyryp aıta alamyz. Búginde Qazaqstan barysyn álem biledi, bul salanyń sózsiz kóshbasshylary, aty ańyzǵa aınalǵan shoqtyǵy bıik sportshylarymyzdyń toby qalyptasqan. Mine osy sekildi Qazaqstandyq dzıýdo óneriniń de juldyzdaryn qalyptastyrýymyz kerek. Otandyq dzıýdo óneri áli de óziniń múmkindikterin tolyqqandy kórsetken joq, aýyldarda beldesip ósken talaı qarakózden chempıondar jasaımyz», dedi jańa saılanǵan Qazaqstan dzıýdo federatsııasynyń prezıdenti Qýanyshbek Esekeev.
Sondaı-aq konferentsııa barysynda el óńirlerinde dzıýdonyń damýy, Federatsııanyń 2022 jyly sporttyq is-sharalardy ótkizýi jáne QR Ulttyq quramasynyń Frantsııadaǵy
2024 jylǵy Olımpıada oıyndaryna daıyndyq barysy týraly esepter tyńdaldy. Búgingi tańda dzıýdomen aınalysatyn sportshylar sany 90 myńǵa jýyqtady. Bul kórsetkish kúrt ulǵaıýy ábden múmkin, sebebi dál osy sportqa baýlıtyn sektsııalar men klýbtar sany bir ǵana Astananyń ózinde 1 jylda 3 ese artqan, ıaǵnı 2021 jyly dzıýdo kúresin damytatyn 11 sport klýb jumys istese, búginde mundaı ortalyqtar sany 35-ke jetti.
