Qýanysh Sultanov: Elbasy baıandamasy - oryndalǵan paryz kodeksi
«Bizdiń kópshiligimiz, osynda otyrǵan zamandastar eki dáýirde ómir súrip kelemiz. Búgingi kezdesýimiz keıbir sholaqtaý oılaıtyn zamandastarymyz baǵalaǵandaı, ótkendi ańsaý emes. Búgin tarıhtan sabaq alyp, ósý joldarymyzdy jadymyzda saqtadyq, teńsizdikten arylyp, eldikke qol jetkizýdiń qadir-qasıetin túsindik. Sizdiń el basshylyǵynda qyzmet etken 30 jylyńyzǵa oraı ótip jatqan konferentsııaǵa Qasym-Jomart Toqaev ekeýińiz qatysyp, sóz sóılegenderińiz - yntymaqtyń, bılik birliginiń úlgisi. Naǵyz memlekettik órkendeý sabaqtastyǵynyń aıqyn kórinisi desek bolady. Búgingi baıandamańyzdy tolqymaı tyńdaý múmkin emes. Men buny sizdiń atqarǵan paryzyńyzdyń kodeksi dep qabyldadym», - dedi Qýanysh Sultanov.
Qýanysh Sultanovtyń aıtýynsha, Elbasynyń ár jyldary kótergen bastamasy, memleket múddesine aıtylǵan árbir sózi, qalyń eldiń kóńilinen shyǵyp keledi.
«Stýdent jastardyń sherýine baılanysty 1987 jyly ortalyq komıteti arnaıy qaýly qabyldap «qazahskıı natsıonalızm» dep baǵa berdi. Nursultan Nazarbaev osy qaýlynyń ádiletsizdigin dáleldep, áldeneshe ret saıası minberlerge shyǵyp júrip, qaýlynyń kúshin joıǵyzdy. Bul bıleýshi kompartııa tarıhynda buryn sońdy bolmaǵan nárse. Birinshi hatshy bolysymen 1 aıdan keıin Qaraǵandydaǵy shahterlerdiń ereýilin toqtatty. UOS-ta erligi qazaq sheńberinen alysqa shyǵyp júrse de laıyqty baǵasyn ala almaǵan Baýyrjan Momyshulyna Keńes odaǵy batyry ataǵyn bergizdi. Memlekettik basqarýdy jańǵyrtyp, Semeı polıgonyn japty. Kosmodrom qazaq jerinde bolsa da qazaq ǵaryshkerleri bolmaǵan. Toqtar Áýbákirov pen Talǵat Musabaevty ǵaryshqa ushyrdy. Dúnıejúzi qazaqtarynyń tuńǵysh quryltaıyn ótkizip, 1 mln otandasymyzdyń otanyna oralýyna esik ashyp, jaǵdaı jasady. 30 jylda osydan buryn 300 jylda qolymyz jetpegen armanǵa Nursultan Ábishuly qolymyzdy jetkizdi», - dedi Qýanysh Sultanov.
Aıta keteıik, búgin Almatyda QR Tuńǵysh Prezıdenti Nursultan Nazarbaevtyń saıası kóshbasshylyq fenomenin zertteýge arnalǵan «Kemeńgerliktiń 30 jyly» halyqaralyq ǵylymı konferentsııa ótip jatyr.
Konferentsııaǵa QR Prezıdenti Qasym-Jomart Toqaev pen Elbasy Nursultan Nazarbaev qatysty.
