Qýanysh Ájmaǵanbetov «Almaty oblysynyń Qurmetti azamaty» atandy
TALDYQORǴAN.QazAqparat - Búgin Almaty oblysynyń ákimi Amandyq Batalov óńirdegi kásipkerlikti damytý jónindegi qorytyndy kezdesýge qatysty. A.Batalov aldymen aımaqtyń úzdik kásipkerlerin marapattady, dep habarlaıdy QazAqparat tilshisi.
«Almaty oblysynyń Qurmetti azamaty» ataǵy «Qaınar-AKB» baqylaý keńesiniń tóraǵasy Qýanysh Ájmaǵanbetovke berildi. Bıylǵy jyly atalǵan kásiporyn 2,5 mıllıon akkýmýlıator shyǵardy.
«Almaty oblysynda shaǵyn jáne orta bıznestiń qarqyndy damýy baıqalady. Jyl qorytyndysy boıynsha ónerkásip óndirisiniń kólemi 750 mlrd. teńgege jýyqtady. 30 myńǵa tarta jumys orny quryldy. Bul rette Sizder, oblys kásipkerleri, úlken úles qostyńyzdar, sol úshin barshańyzǵa shynaıy rızashylyǵymdy bildiremin. Erekshe atap ótetinim, Sizderdiń eńbekterińiz «Paryz», «Altyn sapa» baıqaýlarynda úzdikter qatarynda atalyp, jeńimpaz boldy. Bul - úlken jetistik, basqasynyń bári kúndelikti eńbekpen keledi. Sizderge oblystyń áleýmettik-ekonomıkalyq damýyna qosqan úlesterińiz úshin alǵys aıtyp, zor densaýlyq tileımin, birlesken jumysymyz jemisti bolsyn! - dedi A.Batalov.
Atap óterligi, jyl qorytyndysy boıynsha jalpy óńirlik ónim 2,5 trln. teńgege jetti. Onyń 30% jýyǵy shaǵyn jáne orta bıznesten quralyp otyr. Búgingi kúni Almaty oblysynyń kásipkerlik salasynda 280 myń adam jumys isteıdi, nemese oblystyń árbir úshinshi turǵyny jumys isteıtinder qatarynda, olar jergilikti bıýdjet túsiminiń 43%-in qurap otyr.
