Qýanysh Aıtahanovtyń 70 jasqa tolǵan mereıtoıy atalyp ótti - OQO
ShYMKENT. QazAqparat - Ońtústik Qazaqstan oblysynda óńirdiń qurmetti azamaty, «Parasat» jáne «Qurmet» ordenderiniń ıegeri Qýanysh Aıtahanovtyń 70 jasqa tolǵan mereıtoıy atalyp ótti.
Aıtýly kúnge oraı, el aǵasy jerlesterimen kezdesip, ystyq yqylasqa bólendi, dep habarlaıdy QazAqparat tilshisi.
Oblystyq «Otyrar» ǵylymı-ámbebap kitaphanasynda ótken sharada atpal azamattyń eren eńbegi men óńirdiń damýyna qosqan úlesi sóz boldy. Eńbekpen eseıip, talappen qanatyn qataıtqan qaıratty erdiń ómir joly jastarǵa úlgi etildi.
Aıta keteıik, qarasha aıynda dúnıe esigin ashqan atpal azamat qarapaıym aýyl sharýashylyǵy salasynyń mamany bola júrip, bilimi men biliktiliginiń arqasynda qyzmet satysynda joǵary kóterildi. Birneshe aýdandy basqardy. Halyq qalaýlysy bola júrip te eldi qoldaıtyn, múddesin oılaıtyn pármeninen aıyrylǵan joq. Depýtat retinde til mártebesi, jer máselesine qatysty ózekti máselelerdi kóterdi.
Alqaly jıynda sóz alǵandar Qýanysh Aıtahanovtyń azamattyǵyn, qaıratkerligin tilge tıek etti. Dara tulǵasy men bilim-parasatyn keıingi tolqynǵa úlgi etti. 70-ke kelip, kemeldengen el aǵasynyń keıingi tolqynǵa aıtar jalǵyz ósıeti - adaldyq. Sonymen qatar Qýanysh Aıtahanuly óziniń ómirden kórgen, túıgenin birneshe kitapqa arqaý etken. Sol dúnıesin keıingi tolqynǵa usyndy. Onyń týyndylary arnaıy kórmege qoıylyp, kópshilik nazaryna usynyldy.
