Qýantyrov teńgeniń 30 jylda 56 ese qunsyzdanýyna baılanysty pikir bildirdi
Ulttyq ekonomıka mınıstri Álibek Qýantyrov Úkimet otyrysynan keıin ótken brıfıngide teńgeniń 30 jylda 56 ese qunsyzdanýyna baılanysty pikir bildirdi, dep habarlaıdy Kazinform.
«Búgin – Ulttyq valıýta kúni. Ulttyq valıýtamyzdyń engizilgenine 30 jyl boldy. Teńge qoldanysqa engizilgennen beri 56 ese qunsyzdanypty. Onyń keleshegi týraly ne aıtasyz? Áli de qunsyzdana bere me, álde teńge nyǵaıatyndaı faktorlar paıda bolyp kele jatyr ma?», - dep surady jýrnalıst.
Mınıstrdiń sózinshe, teńge baǵamyna aldaǵy úsh jyldyń bederinde ǵana boljam aıtýǵa bolady.
«Teńge qunyna baılanysty boljamǵa kelsek, úsh jyldyq bıýdjette ony 460 teńge deńgeıinde belgiledik. Jalpy teńge quny turaqty bolady dep boljap otyrmyz», - dedi Álibek Qýantyrov.
BAQ ókili Reseı rýbliniń qubylýy, sanktsııalardyń salqyny bul boljamdy qanshalyqty ózgertýge qaýqarly ekenin surady.
«Byltyr siz aıtyp otyrǵan geosaıası jaǵdaı paıda bolǵanda biz bıýdjetti naqtylap, qaıta baǵdarladyq. Sebebi makroeonomıkadaǵy syrtqy faktorlar bizge áser etti. ıAǵnı, bıýdjetke tıisti ózgerister engizdik. Sodan keıin áleýmettik-ekonomıkalyq damýdyń 5 jyldyq boljamyna da tıisti túzetý jasadyq. Demek, ondaı quqyǵymyz bar. Kerek bolyp jatsa, taǵy isteımiz. Oǵan qajet rezervimiz bar», - dedi Ulttyq ekonomıka mınıstri.
