Qýańshylyqtan zardap shekken túrkistandyq sharýalarǵa jeńildetilgen nesıe beriletin boldy

TÚRKІSTAN. QazAqparat - Bıylǵy qýańshylyqtan zardap shekken Túrkistan oblysyndaǵy Saryaǵash pen Keles aýdandarynyń sharýalaryna qysqy mal azyǵyn satyp alý úshin tómen paıyzben nesıe beriletin boldy. Mundaı sheshimdi oblystyq aýylsharýashylyǵy basqarmasynyń basshylyǵy men birqatar qarjy uıymdarynyń ókilderi qabyldaǵan, dep habarlaıdy QazAqparat tilshisi.

Buǵan deıin eki aýdannyń sharýalary tórt túligin qyrkúıek aıynan beri qorada ustap, qoldan jem shóp berip jatqanyn aıtqan edi. Osydan keıin salaǵa jaýapty basqarma basshysylary men «Yrys» qarjy uıymy mamandary Álimtaý, Jambyl, Bozaı aýyldyq okrýgteriniń 100–ge jýyq sharýasymen kezdesti. Olarǵa aldaǵy ýaqytta beriletin nesıeniń sharttaryn túsindirip, jyldyq ústeme qarjysy 6 paıyzdan aspaıtynyn jetkizdi. Sondaı-aq mal ustaıtyn azamattarǵa qıyndyq týǵyzǵan nesıe alý úshin kásipkerlik sertıfıkaty talap etilmeıtinin atap ótti.

Aıta keteıik, óńirdiń aýyl sharýashylyǵy tarapynan aǵymdaǵy jyldyń 10 aıynda aýyl sharýashylyǵy janýarlarynyń analyq basyna Saryaǵash aýdany boıynsha 112 AShTÓ-ge 170 606,5 myń teńge, Keles aýdany boıynsha 106 AShTÓ-ge 233 164,5 myń teńge memlekettik qoldaý qarjy (sýbsıdııa) berilgen bolatyn.