Qýańshylyqta Mańǵystaý men Qyzylorda oblystaryna qandaı kómek kórsetildi
«Elimizdiń batysy men ońtústiginde qatty sezilgen qýańshylyqtan keıingi jaǵdaıǵa qandaı baǵa beresizder? Kelesi jyly mundaı jaıt bolmaýy úshin qandaı jospar qurylyp, aldyn alý jumystary júrip jatyr?», - degen suraq qoıyldy mınıstrge Ortalyq kommýnıkatsııalar qyzmetinde.
«Rasynda da bıylǵy kóktem-jazda eki óńirge ońaı bolǵan joq, mal azyǵynyń tapshylyǵynyń sebebi – qysta qar bolmaı, kóktemde jaýyn bolmaı, shóptiń az bolýy. Sol sebepti biz bıyl operatıvtik shtab quryp, mınıstrlik tarapynan sol shtabty turaqty túrde ótkizdik, biraz jumys atqaryldy. Búgingi kúni respýblıka boıynsha 23,9 mln tonna pishen ázirlendi nemese jospardyń 100 paıyzy daıyndaldy, 1,6 mln tonna pishendeme, 1,4 mln tonna súrlem jáne saban men qunarlandyrylǵan azyqtar da ázirlenip jatyr», - dep jaýap berdi E. Qarashókeev.
Mınıstrdiń aıtýynsha, Mańǵystaý óńiri boıynsha aýyl sharýashylyǵy maldaryn qystatý úshin 77 myń tonna pishen jáne 53 myń tonna qunarly azyq qajet.
«Ony daıyndaý úshin jospar quryldy, jospar boıynsha 75 paıyz pishen, 55 paıyz qunarly azyq daıyndaldy. Sol sebepti memleket, úkimet rezervinen 3,6 mlrd teńge bólingen edi, sol qarajattan 1,9 mlrd teńge – arnaıy Mańǵystaý oblysyna bólindi. Osy 14 qazandaǵy jaǵdaı boıynsha, sol 1,9 mlrd teńgeniń 1,2 mlrd teńgesi ıgerildi. Búgingi tańda 790 sharýa qojalyǵyna, 7 myńǵa jýyq jeke-qosalqy sharýashylyqtarǵa osy kómek tólendi», - dep túsindirdi spıker.
Al Qyzylorda oblysyna Úkimet rezervinen 1,7 mlrd teńge bólindi, qazirgi ýaqytta bul qarajat 100 paıyz ıgerilip, 1100 sharýa qojalyǵyna kómek tólendi.
«Odan basqa Mańǵystaý óńirinde «Kaspıı» ÁKK arqyly jergilikti bıýdjetten de qarajat bólinip jatyr. Ol pishen men qunarly jem daıyndaýǵa jumsalyp, kúzdiń aıaǵyna deıin jem-shóp tolyq kólemde daıyndalady dep jergilikti ákimdik aqparat berdi. Qurǵaqshylyqtan zardap shekken sharýalarǵa aqshadan da basqa kómek kórsetilgen bolatyn. Birinshiden, fermerlerdiń alǵan nesıelerin uzartý jumysy júrgizildi, temirjol men azyq-túlik tasý úshin qoldanylatyn tarıfter 77 paıyzǵa arzandatyldy, ol tarıf qazir de jumys istep tur. Basqa óńirlerden de Mańǵystaý oblysyna jeńildetilgen tarıf arqasynda biraz jem-shóp tasylyp jatyr», - dedi mınıstr.
Strategııalyq sıpattaǵy sharalar boıynsha, mınıstrlik mal azyǵyn óndirisi salasyn damytý boıynsha arnaıy jol kartasyn ázirlegen.
«Jol kartasynyń negizi sátteri – birinshiden, alańdardy jáne tıisinshe azyq daqyldaryn óndirý kólemin ulǵaıtý. Ekinshiden, árbir aýyl sharýashylyǵy daqyldaryn, egis alańdaryn ártaraptandyrý josparyn jasaý, ol jospardyń oryndalýyn ákimdiktermen birlesip ózimiz qadaǵalaımyz. Jeńildetilgen kredıt berý jáne ınvestıtsııalyq sýbsıdııalar arqyly jaıylymdardy sýlandyrý ınfraqurylymyn qurýdy yntalandyrý, oǵan da qarajat bólinetin bolady. Jaıylym aınalymdaryn engizý jáne saqtaý, tamyryn jáne ústińdi betin jaqsartý esebinen jaıylymdardyń ónimdiligin arttyrý, bul da – jol kartasynyń mańyzdy baǵyty.
Іri astyq óndirýshilerdiń iri tutynýshylarǵa, qospa jem zaýyttaryn jáne basqa da kásiporyndardy jem men astyqtyń bir bóligin mindetti túrde satýy normasyn engizeıin dep otyrmyz. Sebebi jem-shóptiń ónim kólemi ishki naryqqa da túsýi kerek. Bul sharalar túptep kelgende mal sharýashylyǵyn damytý turaqtylyǵyn arttyrýǵa jáne osy salanyń kún raıy aýytqýlarynyń táýeldigin barynsha tómendetýge yqpal etedi. Ózimiz de kelesi jyly qıyn bolmaıdy dep senip otyrmyz. Strategııalyq jáne qazirgi ýaqytta qajet sharalardyń bárin atqaryp jatyrmyz», - dedi Aýyl sharýashylyǵy mınıstri.