Qýańshylyq bolǵan Mańǵystaý men Qyzylorda oblystarynyń qazirgi jaǵdaıy qandaı

ASTANA. QazAqparat – QR Aýyl sharýashylyǵy mınıstrligi buryn qýańshylyqtan zardap shekken Mańǵystaý men Qyzylorda oblystarynyń qazirgi ahýalyn, qysqa daıyndyǵyn baıandady, dep habarlaıdy QazAqparat.

Búgingi kúni elimizde aldaǵy qystaýǵa 25 mln tonna shóp qajettiligi bar, is júzinde 14,6 mln tonna nemese 59% daıyndaldy. Josparlanǵan 1,4 mln tonna pishendemeniń 57% daıyndaldy. Saban, súrlem jáne jemniń negizgi daıyndaý mezgili qyrkúıek aıynan bastalatynyn aıta ketý kerek

, - dep jazylǵan mınıstrliktiń resmı jaýabynda.

Qyzylorda oblysy boıynsha búginde shóp boıynsha jospardyń 55% daıyndaldy, bul jalpy jyl saıynǵy qarqynǵa sáıkes keledi. Onda maldyń negizgi túrleriniń kóbeıýi baıqalady. Máselen, jartyjyldyq qorytyndysy boıynsha iri qara mal basy ótken jylǵy deńgeımen salystyrǵanda 2,1%, qoı – 2,4%, eshki – 1,6%, jylqy – 7,6%, túıe – 3,4% artqan.

Al Mańǵystaý oblysynda shóp daıyndaý qarqyny baıaý júrip jatqany baıqalady (jospardyń 16% ǵana). Óńirdiń tabıǵı-klımattyq jaǵdaılary tutastaı alǵanda tıimdi mal sharýashylyǵyn júrgizýge qolaısyz. Sodan tek qurǵaq jaǵdaılarǵa beıimdelgen maldyń ósimi baıqalady. Máselen jylqy sany 2,9%, túıeler 4,2% artqan.

Mınıstrlik tarapynan jem-shópti sátti daıyndaý úshin birqatar shara qabyldandy. Máselen, memlekettik qoldaý sharalary sheńberinde óńirlerde jem-shóp daıyndaýdy sýbsıdııalaýǵa 11,7 mlrd teńge kózdelgen, onyń ishinde Qyzylorda oblysy boıynsha – 375,8 mln teńge, Mańǵystaý oblysy boıynsha 727,7 mln teńge qarastyrylǵan. Bul 2021 jyly bólingen sýbsıdııalar kóleminen 7 ese kóp. «QazAgroQarjy» AQ jarǵylyq kapıtalyn 20 mlrd teńge somasyna ulǵaıtýǵa, jem-shóp daıyndaý tehnıkasy men sýarýdyń utqyr júıelerin qarjylandyrý úshin bıýdjettik ınvestıtsııalar bólindi

, - deıdi mınıstrlik.

Qolaısyz tabıǵı faktorlardan zardap shekken fermerlik sharýashylyqtardyń kredıttik mindettemelerin keıinge qaldyrý máselesi pysyqtalýda.

Bıyl alǵash ret 58 myń tonna kóleminde mal azyǵyn daıyndaýǵa jeńildetilgen baǵamen dızel otynynyń qosymsha kólemi bólindi.

Sonymen qatar Azyq-túlik korporatsııasy 235,2 myń tonna jem-shóp qoryn jınady jáne bul kólem qajet bolǵan jaǵdaıda arzan baǵamen mal sharýashylyǵyn qoldaýǵa jiberiledi.

Óz kezeginde mınıstrlik júıeli shara retinde Mal azyǵy óndirisin damytýdyń 2022-2025 jyldarǵa arnalǵan jol kartasyn júzege asyrýda. Onyń ishinde mal azyǵy daqyldarynyń jalpy jıynyn ulǵaıtý, olardyń tuqym sharýashylyǵy júıesin ǵylymı negizde damytý, mal azyǵyn óndirý jónindegi ǵylymı-zertteý jumystaryn qarjylandyrýǵa jergilikti bıýdjetten qarjy bólý sharalary qarastyrylǵan. Osylaısha ınnovatsııalyq jobalardy qarjylandyrý (019) bıýdjettik baǵdarlamasy boıynsha Mańǵystaýda 2 joba júzege asyrylýda. Olar: «Mańǵystaý oblysy Mańǵystaý aýdany jaıylymyndaǵy sý qoryn eskere otyryp, geoaqparattyq júıe tehnologııasy arqyly turaqty basqarý» jáne «Mańǵystaýdyń shóleıt aımaǵynyń sýarmaly jaǵdaıynda jem-shóp daqyldaryn ósirýdiń ǵylymı praktıkalyq tásilderi». Joba tolyq iske asqan jaǵdaıda – jańa ádisterdi qoldanyp, mal azyǵy bolatyn kópjyldyq ekpeli shópter ósiriledi

, - deıdi Aýyl sharýashylyǵy mınıstrligi.