Qýańshylyqqa qaramastan astyq túsimi kópjyldyq ortasha kórsetkishten joǵary bolady – AShM
ASTANA. KAZINFORM – 20 mln tonnaǵa jýyq astyq bastyryldy. Bul týraly búgin Úkimet otyrysynda Aýyl sharýashylyǵy vıtse-mınıstri Azat Sultanov aıtty.
- Qazirgi ýaqytta respýblıkanyń barlyq óńirinde egin jınaý naýqany jalǵasyp jatyr. Aǵymdaǵy maýsymda vegetatsııalyq kezeńdegi aýa raıy jaǵdaılary árkelki qalyptasty. Respýblıkanyń jekelegen soltústik jáne ortalyq óńirlerinde jaýyn-shashyn mólsheri jetkiliksiz boldy. Bul dándi daqyldar óniminiń qalyptasýyna qosymsha táýekelder týyndatty. Aldyńǵy jyldary osyndaı aýa raıy jaǵdaıynda ónimdilik 8-9 tsentnerden aspaıtyn edi. Alaıda, Úkimet tarapynan qabyldanǵan sharalardyń, onyń ishinde jeńildetilgen qarjylandyrýdyń arqasynda sharýalar qajetti agrotehnıkalyq is-sharalardy ýaqtyly ári sapaly júrgize aldy, - dedi vıtse-mınıstr.
Onyń atap ótýinshe, salada egis alqaptaryn ártaraptandyrý jumystary jalǵasyp jatyr. Máselen, bıdaı alqaptaryn qysqartý, maıly jáne basqa da joǵary rentabeldi daqyldardyń alqaptaryn ulǵaıtýmen qatar júrgizildi.
- Osylaısha, 2024 jyldan bastap maıly daqyldardyń egis alqaby 2,2 mln gektarǵa ulǵaıyp, 5,2 mln gektardy qurady. Sonymen qatar, qaıta óńdeý kásiporyndaryn shıkizatpen qamtamasyz etý maqsatynda júgeri alqaby eki jyl ishinde 120 myń gektarǵa ulǵaıdy, - dedi Azat Sultanov.
Vıtse-mınıstrdiń aıtýynsha, júrgizilgen ártaraptandyrý jumystarynyń nátıjesinde egis alqaptarynyń qurylymy ózgerdi. Atap aıtqanda, dándi daqyldardyń egis qurylymyndaǵy úlesi 72%-dan 66%-ǵa deıin tómendedi, al maıly daqyldardyń úlesi 13%-dan 18%-ǵa deıin ósti.
- Egin jınaý alańy 24,2 mln gektardy quraıdy. Onyń 15,6 mln gektardan astamy dándi jáne dándi-burshaqty daqyldarǵa tıesili. Egin jınaý jumystary ýaqytyly bastaldy jáne qarqyny ótken jyldan joǵary. Búgingi tańda 13,5 mln gektar dándi daqyl nemese 83%-y jınaldy. Ortasha ónimdilik gektaryna 14,7 tsentnerdi qurap, 19,9 mln tonna astyq bastyryldy. Jalpy, dándi daqyldardyń jalpy túsimi kópjyldyq ortasha kórsetkishterden joǵary bolady dep boljanyp otyr. Kútiletin astyq kólemi azyq-túlik, mal azyǵy jáne tuqymǵa degen qajettilikti tolyq qamtamasyz etýge, sondaı-aq eksport áleýetin saqtap qalýǵa múmkindik beredi, - dedi ol.
Aıta keteıik, otyrysta kúzgi jıyn-terim barysy qaralyp jatyr.
